3856/2022-2023

Aizawl the 16th March 2023 : Mizorama cham mek National Cadet Corps (NCC) Director General Lt.Gen.Gurbirpal Singh leh a hote chuan vawiin khan Mizoram Governor Dr Hari Babu Kambhampati chu a chenna Raj Bhavan-ah vawiin chawhma khan tlawhin NCC hmalakna hrang hrang an sawipui.

NCC hian Mizoram chhunga Unit 4 an neih mekah pathum hi Aizawlah awmin pakhat hi Lungleiah a awm thung a. Mizoram University ah NCC hi dah tura hmalak mek a nih dan te Director General hian a sawi a. Mizoram chauh ni lo North East State dang, Assam leh Tripura a State University ah te pawh dah belh tum a nih thu a sawi a ni. NCC in India ram tana a hnathawh hrang hrang te, a bik takin vantlang mipui te leh thalaite hmasawnna tura tan a lak dan te, faina leh thianghlimna inzirtir kawngah leh sik leh sa humhalhnaa tha an thawh te chu Governor chuan fakawm a tih thu a sawi a ni.

DG hi Brig RP Pandey, Deputy Director General, North Eastern Region NCC Directorate leh Brig Arun Unyial, Group Commander, Silchar NCC Group ten an tawiawm a ni.