India hmarchhaka Cooperatives hmalakna tihhmasawnna leh Cooperative Society te thuam chak zel dan tur ngaihtuah tura National Cooperative Development Corporation (NCDC) buatsaih Cooperative Summit chu vawiin August ni 21, 2015 khan State Convention Centre, Shillong-ah a kharna hun hman a ni a. He hunah hian Mizoram aiawhin  Cooperation Minister Pu Lalrinmawia Ralte chu a tel a ni.

Thusawiin Pu Lalrinmawia Ralte chuan Cooperatives lama Mizoram sorkar hmalak mekna leh hmachhawpte, mirethei te  tihhmasawnna atana Cooperative Society hrang hrangte tangkaina leh hmalakna te, an harsatna tawh hrang hrang te, Sorkar laipui leh NCDC atanga chhawmdawlna pek dan her remna tur rawtna te kalkhawmte hmaah a sawi a. Mizoram chu International Boundary thui tak nei, Myanmar leh Bangladesh te'n a karcheh a nih avangin harsatna hrang hrangin a chim reng a. Hei hian ei leh bar zawnna leh hmasawnna kawng tam takah a tithuanawp a. Mizoram harsatna bik hi State dangte leh Sorkar laipui pawhin hrethiam a, ruahmanna siamna reng rengah heti zawnga ngaihtuahna a senpui a pawimawh em em a ni, a ti.

He Summit-ah hian Meghalaya Chief Minister Dr. Mukul Sangma chu Chairman niin, hmarchhak State hrang hrang aiawhte an kalkhawm a. Sorkar laipui atangin Union Minister of State for Agriculture & Cooperation, Pu Mohan Bhai Kalyanjibhai Kundariya leh Union Minister of State for Home Affairs Pu Kirenri Jiju te'n an telpui bawk.

Chawhma Session-ah State hrang hrang Minister te'n mahni State theuh hmalakna te, hmachhawp leh harsatna te, sorkar laipui atanga State sorkar-te beiseina leh hmalakna atana rawtna te an sawi. Sorkar laipui aiawhte pawhin hmarchhak State te tana hmachhawp te, Cooperative hmalakna pawimawhna te leh Sorkar laipui inhuamna te an sawi bawk.

Chawhnu-ah Technical Session hman niin State hrang hrang aiawhte'n chipchiar zawka Presentation pein sawihona tha tak neih a ni bawk.

Minister of State Pu Lalrinmawia Ralte hi Cooperation Secretary Pu Jack L. Darkim, Mizofed Chairman Pu K. Laldawngliana, Cooperation DRCS Pu Lalrinsanga leh Shillong Mizoram House-a Deputy Resident Commissioner Pu Jacob Lalawmpuia  te'n an tawiawm a. Cooperative Society te aiawhin East Phaileng, Phullen leh Chhinga Veng, Aizawl atangtein Society hruaitu engemaw zat an tel bawk.

 

Attachment

  • Loading attachment...