Vawiin chawhma dar 11:00 khan Serchhip LAD Conference Hall-ah khawpuia miretheite tana Sawrkar hmalakna pakhat National Urban Livelihood Mission (NULM) hnuaia "Employment through Skill Training & Placement" (EST&P) programme hnuaia Training tura thlanchhuahte Counselling neih pui an ni.

Pu S.T. Lalhmingmawia, Project Manager, NULM, Serchhip chuan trainee te fuihna thu sawiin NULM Scheme thar hnuaia training tura thlan an ni chu a lawmpui thu leh Scheme hlawhtlinna chu anmahni ah a innghah thu a hrilh a, Sawrkar atanga sum lo kal beitham te it vang mai mai ni lova, hlawhtlinpuina tham zirchhuak tur zawk a taima tak leh thahnemngai taka training neih chhunga theihtawp chhuah turin a chah a, attendance ngaihpawimawh anih tur thu pawh sawiin he Scheme hnuaia Trade hrang hrang a training chhuakte tan eizawnna kawng pawh dap sak chhunzawm zel tum anih thu a sawi bawk.

EST&P,NULM 2015-2016 hnuaiah hian Serchhip khawpui huamchhunga BPL chhungkua te atang mi 130 in Trade hrang hrang 6 hnuaiah training an nei dawn a, chungte chu : Carpentry-11, Motor Driving-13, Mushroom Cultivation-10, Cosmetology & Beautician-10, Candle-Making-15 leh Tailoring-71 an ni a, karleh thawhtan (August ni 24, 2015) atang hian Training Centre hrang hrang 15 ah skill training hi an tan dawn a, training rei chhung hi Trade hrang hrang azirin a in anglo a,  heng training neih chhung hian Service Training Provider (STP) ten a hmunah an vil reng dawn a ni.

Vawiin Counselling hun Pi Lawmzuali, Manager/Specialist (Skill Training & Micro-Enterprise) in kaihruaiin trainee te tana hriat tur pawimawh leh training kalphung te hrilhfiahna hun a hmang a ni.