Vawiin chawhma dar 11:00 khan Consultative Committee under Higher & Technical Education Department chu I&PR Conference Hall ah neih a ni.

Consultative Committee ah hian Pu R. Romawia, Minister, Higher & Technical Education Department chu Chairman a ni a. Vice Chairman Pu H.Zothangliana, Parliamentary Secretary bakah member te - Pu S.Laldingliana MLA, Pu NK Chakma MLA, Pu RL Pianmawia MLA, Pu R.Vanlalvena MLA, Er.Lalrinawma MLA leh Dr. K.Beichhua MLA te an ni.Meeting-ah hian Higher & Technical Education Commissioner leh Member Secretary ni bawk Pu K. Lal Nghinglova leh officials engemaw zat an tel a ni.

Meeting-ah hian Higher & Technical Education hnuaia Schemes Projects/Programme hrang hrang hmalakna kal mek thlir ho a ni a. Thawktu indaih lohna leh post ruak awm mek hnawhkhah a harsat thu te sawi ho a nih bakah DoNER (NLCPR) Fund atanga hnathawh mek te, Special Plan Assistance (SPA) leh Special Central Assistance (SCA) Scheme hnuaia hnathawh kal mek te leh RUSA Scheme State in a kalpui dante thlirho a ni bawk.

State Matching Share a hun taka neih a harsat avanga project kal mek kalpui a harsatna te pawh sawiho a ni a. Technical Wing, Hindi Training College leh Institute of Advanced Study in Education (IASE) bika harsatna awm leh mamawh te sawiho niin H&TE Department hnuaia hmalakna leh harsatna hrang hrangte uluk taka sawi hovin, harsatna sutkian dan tur ngaihtuahho a ni.