National Commission for Protection of Child Rights, NCPCR leh Mizoram State Commissioon for Protection of Child Rights, MSCPCR tangkawpin vawiin khan ruihhlo laka naupangte an him theihna tura inrawnkhawmna state level consultation on substance use among childrenAizawlah an buatsaih.

Ramhlun Indoor Stadium Conference Hall-a neih sawihonaah hian NCPCR Registrar Jaganath Pati chuan naupangte khua leh tui thaa chher chhuak turin an naupan laia nun nuam leh zalen an neih a ngai a, naupang tam tak ruihhlo avanga harsatna tawk an awm tak avangin he thil tha lo hneh taka do let turin huamzau zawka inrawnkhawmna buatsaih a tul ta a ni a ti.

MSCPCR Chairperson Pi Sangzuali Vanchhawng pawhin thu sawiin, naupangte zingah ruihhlo tih ching an pung chho zel a, naupang zinga ruihhlo tih ching kum zat pawh a  hniam zel a, naupang kum 9 mi lek, ruihhlo avanga buai te an awm tak hial avangin he thil tha lo do let tura ngaihtuahna sen tlan a tul ta a ni a ti.

Zirhonaah hian Shaloam Chief Executive Officer Dr Chawnglungmuana, MSD&RB aiawhin Pu Benjamin Laltanpuia leh LifCode aiawhin Pu Moses Zofaka ten ruihhlo leh a kaihnawih chungchangah thu an sawi a, inrawnkhawmna-a tel, Mizoram Police aiawh, SCERT aiawh leh ruihhlo dona kawnga inhmang mekte chuan ruihhlo laka naupangte an him theihna tura rawtna an neihte huamzau takin an sawiho zui a ni.

Sawihona-a tarlan anih danin kum naupang te te, ruihhlo khawih an pung chho hle a, naupang ruihhlo avanga buaite enkawlna hmun, Lifecode-a enkawl te zingah kum 2015 atang khan kum 11 leh 15 inkar mipa 39 leh hmeichhia 12 an vaiin 51 an awm tawh a, kum 16 leh 18 inkar naupang enkawl mipa 48 leh hmeichhia 22 an vaiin 70 an awm tawh a ni. Heng ruihhlo in a tihbuai naupangte chanchin zirchianna atangin kum 8 velah zuk leh hmuam ching tan-n kum 13 leh 15 inkar velah chuan ruihhlo hlauhawm zawk Heroin an khawih chho tan tawh thin a ni.

Sawihona-a thusawitu mithiamte chuan naupang ruihhlo khawihte chu chhungkaw keh chhia atanga chawr chhuak an ni tlangpui tih an sawi a, chhungkaw tha, ruihhloin a tih buai loh chhungkua leh khawtlang nun nuam nei thei turin Kohhrante pawhin hemi kawngah hian rawngbawlna hak an zauh leh zual a tul tawh tih pawh sawilan a ni bawk.