National Commission for Scheduled Tribes (NCST) Chairperson Dr. Rameshwar Oraon leh amah tawiawmtu Sorkar Laipuia Joint Secretary Pu Aditya Mishra leh NCST Bhopal Regional Office-a Asst. Director Pu R.K. Dubey te chuan Serchhip District-a Dawngzawl ram BSF te tana lak chungchanga Pu Huliana leh mi 13 dang ten NCST hnena vuivaina an thlen chhuizuiin August ni 28 leh 30 chhung hian Mizoram an tlawh a. Vawiin chawhma khan I&PR Conference Hall-ah Home, Revenue leh BSF aiawh te nen thil pawimawh hrang hrang an sawi zui.
Commission chuan ram neitu dik tak ten ram an laksak man a phu tawk an dawn ngei a duh thu te, complaint thehluttute thu leh hla uluk taka ngaihthlaksak tul an tih thu te, ram lak nana sum ruahman cheng vaibelchhe 19.60 atanga ram neitute kutah cheng nuai 70 chauh pekchhuah anga lang te chu uluk taka ennawn tulin an hre bawk.
NCST hotute hian chanchinthar lakhawmtute an kawmzui hnuah vawiin vek khan Mizoram an chhuahsan a ni
