Vawiin chawhma dar 10:30 khan Serchhip DC's Conference Hall-ah Serchhip District Public Information and Grievances Redressal Mechanism lehkhabu chu Serchhip District Bawrhsap Pu P.Lalchhuanga'n a tlangzarh.

He lehkhabu tlangzarhna inkhawm hi Pi K.Vanlalruati, SDO(Sadar), Serchhip chuan a kaihruai a, lehkhabu tlangzarhtu, Pu P.Lalchhuanga, District Bawrhsap chuan thusawiin, he thil hi an thahnemngaih vanga an duan chhuah a ni lova, Sawrkar laipuiin kum 1988 khan hman ngei ngei turin alo ti daih tawh a, amaherawhchu State sawrkar ten an la puitlin hleih theih loh thin a nih thu sawiin, tun sawrkar hian a ngai pawimawh a, District tina DC te chu he thila hma la tur hian a hriattir a. Champhai District-in an siam hmasa ber a, Serchhip District chuan a tha thei ang ber a duh avangin a siam nan pawh hun a duh rei deuh tih a sawi bawk.

He thil hi Chief Minister chuan a ngai pawimawh hle tih sawiin, mipuiten sawrkar department hrang hrangte an lepse-na chi khat a ni chungin Department head te chuan he thil siamna atana hmanrua (information) an thawh that avangin lawmawm a tih thu a sawi bawk. District Bawrhsap chuan he thil hi mipuiten tunge an dawr ang tih an hriatna hmanrua tur a ni a, he lehkhabu-ah hian Department hrang hranga Officer leh staff te hna chanpual leh an phone no. te tarlan vek a ni a. Mipuite tana tangkai tur a ni a, a tangkaina hmang chhuak thei tur chuan VC leh media te mawhphurhna a sang hle tih a sawi bawk.

He ruahmanna-in a tum chu Department-ten enge an thawh tih mipuite hnena puanzarna leh anmahni dawr dan tur kawng hmang kawhhmuhna te leh lungawilohna an thlenna tur te mai bakah an lungawilohna sutkian dan tur kawng kawhhmuhna te thlengin a huam dawn a ni.

Serchhip District-ah chuan Nilaini chawhma dar 10 atanga chawhnu dar 1 thleng hi mipui ten an lungawilohna te department-in an chinfelna hun leh Officer-te tan pawh complaint awm apiang chinfelna hun tura ruat a nih avangin hemi hun chhung hian sawrkar department zawng zawng tan meeting reng reng neih khap tlat a ni a. He ruahmanna hi Serchhip District thuneitute tih mai ni lovin, ruahmanna an siam phawt a, sawrkar chuan an ruahmanna neihte chu a pawmpui hnuah District hrang hrangte pawh Serchhip District hmalakna ang hawi zawnga hma la vek turin a hriattir tih a sawi bawk. Serchhip District chhunga Department hrang hranga mipuiten an lungawilohna an thlen te, an duh anga chinfelsak an nih loh chuan District Bawrhsap Office-ah an thlen leh thei a, chuta an la lungawilo fo a nih chuan GAD-ah la thlen leh zel theih a ni tih a sawi bawk.

Pu H.Lalrinpuia Sub-Deputy Commissioner chuan hemi chungchangah hian kal khawm te zirtirna a pe a, Serchhip-a Department hrang hrang Officer te, VC te leh chanchinbumi thahnem tak an tel a ni.

He lehkhabu hi mipuiten awlsam zawka office an dawr theih nan te, sawrkar hnathawh hrang hrang (schemes) te an hriatchian theih nan te, an lungawilohna leh harsatna an neihte awlsam zawka chinfel theihna atan te a buatsaih a ni a, phek 197-a chhah niin Serchhip District chhunga Department 26 te hnathawh dan tlangpui te, hnathawktute leh an hna chanpual te, an phone no. te thlengin tarlan a nih mai bakah Serchhip District chhunga VC leh YMA hruaitute phone no. thlengin tarlan a ni.