Chhiatrupna a thlen thulha chhanchhuahna hna thawk bik pawl leh hemi chungchanga mipuite zirtirna pe thin sipai hrang hrangte inhlawmkhawmna pawl National Disaster Response Force chuan Kolasib khawpui leh Kolasib District chhunga khaw hrang hrang leh zirna inah te Chhiatrupna thlen thulha hriattur pawimawh inhrilhhriatna, inzirtirna leh hriatzauna ‘Familiarization Exercise’ chu vawiin khan an zo fel ta.

NDRF Team hian May ni 5 a Kolasib District thuneitute nen meeting an neih hnuin, a tuk May ni 6 atangin hmun hrang hrangah Lecture cum Demonstration an nei a. Kolasib ah chuan Govt. Diakkawn High School; Govt. Hmar Veng High School; St. John’s Higher Secondary School; Kolasib Civil Hospital; DIET Kolasib leh Brig. C Vankunga Shopping Centre ah te hun an hmang a. Hetiang bawkin Bilkawhthlir, Vairengte, Thingdawl leh Kawnpui ah te pawh hun hmangin a taka entirna nen zirtirna te an pe a ni.

Vawiin khan Lecture cum Demonstration tawp ber chu DC Office Kolasib ah neiin hemi hnu hian he programme thlirletna meeting DC Conference Hall-ah Kolasib DC Pu Jitender Yadav hovin neih zui nghal a ni a. Kolasib DC chuan chhiatrupna hi khuarel thil, sawi lawk theih loh anih vangin a pumpelhna awm thei te, chhiatna a thlen thulha chet lak dan te, heng huna thil tih tur leh tih loh tur inzirtir leh inhrilhhriat te, hmun him dap leh zawn dan chungchangte mipui a tam thei ang ber kan inzirtir hian engemaw chen ralrinna a awm thei a ni, a ti.

May ni 8 khan Disaster Management & Rehabilitation Department leh Central YMA hnuaia Disaster Management Sub-Committee tangkawpte chuan Diakkawn Community Hall-ah Kolasib YMA Sub Headquarters hnuaia YMA Branch hrang hrang aiawh kalkhawmte tan chhiatrupna a thlen thulha chet lak dan inhrilhhriatna leh inzirtirna ‘Community Awareness Programme on Disaster Management’ tih chu an lo buatsaih tawh bawk a ni.