Vawiin khan NE FIDE Rating Chess Championship vawi 16-na chu Electric Veng YMA Hall-ah Khuallian Pu Zodintluanga, Sports & Youth Services Minister chuan a hawng.

Khuallian chuan Mizoram Chess Association (MCA)-in Northeast pum huap Tournament lian tum li lai a thleng thei chu lawmawm a tih thu sawiin, hruaitute leh player-te inpekna a fak a. “Mizoram sawrkarin Sports discipline hrang hrangte hmasawn nan theihtawp chhuahin hma a la zel a. MCA pawhin sawrkar hma lakna ‘Catch Them Young’ programme thawhpuia naupangte talent a hai chhuak zel hi a lawmawm hle a ni,” tiin, MCA-in sawrkar a mamawhna apiangah sawrkar chuan theihtawpin hma a lakpui zel dawn a ni, a ti bawk. Khuallian chuan Chess player-te chu an taksa hriselna ngai pawimawh tur leh thu chunga khelh chi a nih avang maia an fitness hlamchhiah ngawt lo tura chahin, anmahni support tlat turin an chhungte a ngen nghal bawk.

He tournament hawnna inkhawmah hian Pu C.Laltlanthanga, Mizoram State Sports Council Secretary chu Khual-zahawm a ni a. Pu Rochhunga Ralte, MCA President-in kal khawmte lawmna thu a sawi.

He hunah hian Mizorama Chess-in hma a sawn theih nana mi thahnem ngai leh thawh hlawk tak takte hnenah chawimawina leh lawmpuina (Special Award) hlan a ni bawk.

NE Chess Championship hi kum 1981 khan a tum khat nan Aizawlah khelh tan niin, tun hi a tum 16-na tur a ni a. Champion hmasa ber chu C.Zirliana (Mizoram) niin; tun hi Mizoramin tum li a thlenna tur a ni.

Tun tumah hian Northeast state-te zingah Nagaland tih loh chuan player an rawn tir thei theuh va. Assam (22), Arunachal Pradesh (12), Meghalaya (10), Sikkim (4), Tripura (3), Manipur (2) leh Mizoram (70); an zavaiin mi 123-in tel turin hming an pe lut a ni.

He tournament hi Electric Veng YMA Hall-ah vawiin chawhnu dar 2:30 hian khel tanin, January 23, 2016 (Inrinni) khian a hmawr bawk tum a ni.