Petroleum Conservation Research Association (PCRA) leh Food, Civil Supplies & Consumer Affairs Department te tangkawpa huaihawt leh kum tina hman thin oil leh gas renchem inzirtirna Oil & Gas Conservation Fortnight 2016 chu vawiin chawhma dar 11:00 khan FCS&CA Minister Pu John Rotluangliana’n I&PR Auditorium ah a hawng.

Fortnight hawnna thu sawiin Minister chuan Oil & Gas Conservation awmzia chu tha tak leh tangkai zawka, energy resources te, thil tichhe tlem zawk leh environment vawnghim zawnga hman leh, thangtharte tana hman tur a awm theih nana renchem a ni, a ti. Nitin khawsakna atan oil & gas chu mitin mamawh a nih avangin leh oil & gas laihchhuah te chu zawh hun awm thei a nih avangin mitinin renchem thiam taka kan hman tlan a tul tak zet a ni, a ti bawk. India ramin energy a mamawh 16% chauh ramchhung atanga dehchhuah niin 84% chu ram dang atanga lakluh a nih thu sawiin hemi atan hian kum tin sum tam tak sen a nih dante a tarlang bawk. Lirthei, thilsiamna leh power plant te chuan boruak chhia tam tak siamin mihring leh thilnungte hriselna nasa taka a tihchhiat thin thu te, Green House Gas leh Global Warming a thlen thin dan te a sawifiah a. Chumi harsatna sutkian nan India Sawrkar pawhin kawng hrang hranga hma a lak thu te sawiin Pu John Rotluangliana chuan Oil Company te pawhin lirthei leh thilsiamtute meikhu tihchhuah (Auto Emissioin Norms) khuahkhirhna BS-III (Bharat Stage-III) chu September 2010 atanga an lo duanchhuah thu te a tarlang a, April, 2017 atanga hman turin Auto Fuel Vision & Policy - 2025 te duangin a hmatiama India ram pum chu BS-IV stage-a hlan chhoh tum mek a nih thu te a sawi lang bawk.

LPG chungchang sawiin Minister chuan fuel thianghlim zawk mipuiten an hman theih nan Sawrkar Laipui chuan SAHAJ (or e-SV) hnuaiah LPG connection, rampuma online-a dil theih a duan hnuaiah December 2015 thleng khan connection 162098 pek chhuah a nih tawh thu te a tarlang a. LPG subsidy, customer te hnena a thlen theihna tur scheme PAHAL emaw Direct Benefit Transfer Scheme hnuaiah December 17, 2015 thleng khan customer vaibelchhia 14.72 an inziahluh tawh thu leh, sum cheng vbc 23,000 transfer a nih tawh thu te sawiin PAHAL scheme chu khawvela Direct Benefit Transfer Scheme lian bera puan a nih thu te a sawi lang bawk. Domestic LPG subsidy chu mirethei leh mamawhtu dik tak hnena thleng tura ruahman a nih thu sawiin Minister chuan Give-It-Up scheme hnuaiah December 21, 2015 thleng khan khua leh tui tha nih duh mikhawsa thei deuh chhungkaw nuai 55 zet chuan an LPG subsidy an thehluh tawh thu a puang bawk.

Ni 16-31 January, 2016 chhunga hman tur Oil & Gas Conservation Fortnight hawnna inkhawm hi FCS&CA Director Pu H.L.Rochungnunga’n a kaihruai a, Pu R.Remmawia, Jt. Director, Transport Department, Pu R.Vanramchhuanga, Vice President, Mizoram Consumers Union leh Pu K.Lalnghakliana, President, All Mizoram Petroleum Dealers’ Association ten thusawina hun an hmang bawk a ni.