Dt 15.01.16 (Zirtawpni) khan Transport Minister Pu John Rotluangliana chuan Mizoram chhimtawp khaw pahnih Zochachhuah , Multimodal Transit Transport Road Project a puitlin huna lirthei lian chi ho dahkhawmna tur ruahmanna hmun leh Hmawngbuchhuah, Sairang atanga Rel kawng kal phei zel thlen tawpna hmun tura ruahmante a tlawh a. Minister hi ZIDCO Chairman, Pu V. Lalrobiaka, MLA leh Transport Secretary Pu Hrangtawna, IRTS, Transport Director Pu L. Biakthanga ten an tawiawm a ni.

Amah lawmna inkhawm Zochachhuah khawtlangin an lo buatsaihah Minister chuan, tun atanga reiloteah kan ram mamawh tam zawk hi chhim lam atanga chawkluh a ni tawh dawn a, sumdawnnaah nasa takin kan thang thut dawn a ni. Tlawhpawh kan awlsam sawt anga, khawchhak lama kan unaute nen tam zawkin kan inpawh thei tawh bawk ang. Tin, bungraw thiarvel nan Lawng kan hman theih tawh dawn avangin bungrua pawh tlawm zawkin kan chawlut thei tawh bawk ang. Chu malsawmna lo thleng tur chu hlawk taka chhawr tumin sawrkar chuan Hmawngbuchhuahah Rel Station siam tumin ruahmanna a siam mek a, Zochachhuahah Lirthei kal velte chawlhlawkna tur hmun riam a tum bawk. Nakin lawkah heng sawrkar thil ruahmante hi a takin kan rawn thawk dawn a, chutih hunah chuan zangnadawmna leh therhlo dang um luat vanga hnathawh tithuanawptu nilova, phur taka sawrkar thawhpuitu ni theuh turin ka ngen che u a ni, a ti.

Pu V. Lalrobiaka, MLA pawhin thusawiin vawiina hmun kilkhawra cheng nia kan ngaihte hi reiloteah Mizoram kawtchhuah kan ni thut dawn a, chuvang chuan kan nunkawng tinrengah kan lo inbuatsaiha, kan puanven te kan lo sawichhin a hun tawh a ni, tiin kalkhawmte a fuih bawk.

Zochachhuaha hun hman zawh hnuah a kiang lawk Hmawngbuchhuah khua tlawh leh a ni a, he khuaa amah lo lawmtute hmaah Minister chuan Bairabi atanga Sairang rel kawng laih mek dan te, Sairang atanga chhim lam pan zel tura ruahmanna siam a nih dan leh Hmawngbuchhuah chu Rel Station hmun tura ruahman chhin a nih thute a hrilh a ni.

Minister in ramri khaw pahnih a tlawhnaah hian Lawngtlai atangin Addl. DC Pu R. Lalsangluaia, Addl.SP Pu K.L Vulmawia, DTO Pi Saizikpuii, KMMTTP SDO pathum Pu Lalruatfela Rokhum, Pu Joseph Laldintluanga leh Pu Perry Mihlaw te bakah LADC EM te leh Officials ten an tawiawm a ni.