3689/2023-2024

Dated Serchhip, the 6th February, 2024: Vawiin khan Sericulture Department, Mizoram buatsaih leh hmalaknain Central Silk Board hotu pawimawh te leh India hmarchhak State hrang hrang a Sericulture Department te telna Joint Coordination Committee (JCC) Meeting chu Convention Centre, Thenzawl Golf Course-ah neih a ni.

He JCC Meeting hi Central Silk Board Member Secretary Pu P. Shiva Kumar, IFS chuan a kaihruai a. India hmarchhak huam chhunga Sericulture hmasawnna tur hrang hrang an sawiho a ni. JCC Meeting hi kum dangah chuan Guwahati, Assam ah neih thin a ni a, tuna Mizoramin a thlen hi Guwahati nilo hmundanga nghah a nih vawikhatna a ni a, State pawn atangin member 33 meeting ah hian an lo tel a ni.

He programme hmang tura lo kal Pu Shiva Kumar, Member Secretary, Central Silk Board chuan nimin February ni 5 ah khan Sericulture Department in Silk Samagra 2 hnuaia Project a kalpui mek atanga Eri Cocoon a tharte dahkhawmna hmun a tlawh bawk a. Heng Project hlawhtlinna a taka hmu a, kuthnathawktute tharchhuah ngei Eri Cocoon a hmuh te chuan a tihlawm hle thu leh phurawm a tih thu a sawi a. Central Silk Board Member Secretary chuan phai lama a hralhna tur te pawh a ngaihtuah pui nghal a ni.