North Eastern Council (NEC) Plenary Meet vawi 61-na vawiina New Delhia neihah Chief Minister Pu Lal Thanhawla chuan NEC 12th Plan chhunga khawih tur, Mizoram sorkarin Project 54 a thehluhte chu NEC Plan ah telh anih leh nih loh kan hre lo a ti.

Chief Minister chuan NEC 12th Five Year Plan leh Annual Plan 2012 - 13 sawiho tura Plenary Meet vawi 61 -na a tel thei chu lawmthu a sawi a. Tun tuma NEC draft plan chu department hrang te tea sawipui bak, state levela sawihona a awmlo niin a hriat a ni a ti a. Chuvangin Council Secretariat hian kan project 54te leh rawtna kan thehluhte chu Planah telh ve anih leh nih loh kan hrelo a ni a ti. NEC Plana ngaihpawimawh bikte leh a kalpui dan turte chu state sorkar official liante nen sawiho hmasak tur niawm tak a ni a tiin, hetiang anih chuan NEC hian hmarchhak te tih hmasawnna kawngah pawimawhna a hloh chho thei a ni Chief Minister chuan a ti.

NEC Draft 12th Five Year Plan sum ruahman Rs.13027.38 Crore hi 11th Plan ai khan 48% in a tam a ni Pu Hawla chuan a ti a. Hmarchhak state te mamawhna nen a punna hi a awm hle a, Planning Commissionin 11th Plan sum ruahman a zahve a atih hniam sak ang khan a ti hniam tawh lovang chu tiin a beiseina a sawi a. Kum 2012-13 annual plan sum ruahman Rs.770 Crore erawh a tlem deuh a ni a ti.

Chief Minister chuan NEC official te leh a constituents state official te inhmuhkhawm khat atih thu sawiin, kum 38 kalta chhunga fund pek chungchangah ‘other agencies’ tih ten an dawn tam zawk thin thu a sawi a. Hmarchhak State te mamawh bik a tihte sawilang bawkin, mitin hnena thleng phak hmasawnna siam a ni a. Zirna lam tuaihriam a, thiamna chherchuah a, North Eastern Regional Council rawtna tih puitlin pawimawhna te a sawi a. Ruahtui khawlna kawnga technology thar hman te bakah khuanu rel chhiatna thleng thei, leimin, lirnghing,tuilian leh a dang tam tak laka a inven dan tur leh chhiat thlen hnu a inenkawl dan mumal tak duan tul a tih thu te a tarlang a. Thingtlang mi ten an tangkaipui theih nana Rural Bank tih chakte leh hmarchhak bik tan SIDBI leh NEDFI ten micro credit fund siam tha atih thu te a sawi a, hemi atana Thorat Committee rawtna tih puitlin tul a tihte a sawi a ni.

Chief Minister hi Pu Van Hela Pachuau, Chief Secretary leh Pi L.Tochhawng, Addl Chief Secretary ten an tawiawm a ni.