Ni hnih awh tur North Eastern Council (NEC) Plenary Meeting vawi 68-na chu nimin khan Assam Administrative Staff College, Guwahati ah tan a ni a. He meeting hi Union Home Minister Pu Amit Shah, NEC Chairman ni bawk chuan a kaihruai a; Union Minister of State for DoNER, NEC Vice-Chairman ni bawk Dr. Jitendra Singh leh NEC member dang - hmarchhak state hrang hrang Governor leh Chief Minister-te leh member dangte an kalkhawm a. Mizoram Governor Pu Jagdish Mukhi leh Chief Minister Pu Zoramthanga leh MP (LS) Pu C. Lalrosanga pawh he meeting pawimawh ah hian an tel a ni. Meeting ah hian report ah Mizoram chi NEC Project kalpui tha ber a nih thu sawi a ni.

Meeting ah hian India hmarchhak state pariat Governor leh Chief Minister theuh ten thusawina hun an nei a. Governor Pu Jagdish Mukhi chuan thu a sawi naah India hmarchhak state te hmasawnna atan NEC tangkai zia a sawi a. Heng hmasawnna hna te hi chak zawk leh tuam kim zawka thawh a nih theih nan NEC chu thuamthat tul a tih thu te a sawi a. Mizoram leh hmarchhak state dangte pawh ram leilungin a zirloh avangin inkalpawhna lamah harsatna a tamin, helama hmasawn a pawimawh thu Governor hian a sawi a. India leh South East Asia ramte nen inlaichinna tha zawk nei tur chuan inkalpawhna samkhai zawk neih a tul a. Chumi atan chuan Air connectivity ah hmasawn zual a pawimawh thu sawiin Lengpui chu international airport atana thuam that a, zanah pawh hman theih tura ruahman a tul thu a sawi. Governor chuan Revised Guidelines of North Eastern Council, 2018 hnuaiah hmasawnna atanga pawimawh tak tak - Power, Irrigation leh Flood Control, Water Supply, Sports, School Education leh Primary & Secondary Healthcare te chu paih a ni chu pawi a tih thu leh ngaihtuah tha leh turin meeting ah hian a thlen a ni. Border trade leh investment tha zawk neih a tul zia leh chumi atan chuan action plan mumal zawk neih a tul thu a sawi bawk.

Mizoram Chief Minister Pu Zoramthanga chuan a thusawi naah 10% Gross Budgetary Support (GBS) leh NLCPR (Non-Lapsable Central Pool of Resources) kalphung chu India hmarchhak state ten an tangkaipui em em laiin tun hnaiah a kalphung hi pawlhdal tial tial nia a lan thu Chief Minister chuan meeting-ah hian sawichhuakin, project kallai mek leh a dang thenkat tih lovah chuan funding hi hmun tam takah tih tawp a nih tak thu a sawi a. Sawrkar laipui chuan hei hi ngaipawimawh turin NEC Chairman hnenah chuan a thlen a ni.

NEC Scheme chungchangah Chief Minister chuan kum 2017-18 atanga 2019-20 chhung atana hmarchhak state zawng zawngin an hman tura Rs 4500 crores chauh dah a ni chu state pariatte hmel thlak danglamna tham hmasawnna lang tham siam tur chuan duh khawploh thu a thlen a. External Aided Project (EAP) hnuaia project phalna neih a harsat thu sawi bawkin, EAP hnuaia hna pawimawh tak thawh thin a nih thu leh, approval process thui lutuk in kawng tam taka harsatna a thlen thu Chief Minister chuan a tarlang bawk a. Chief Minister chuan hilly states tan cost norms hranpa siam a tul thu te leh All India Services Cadre hran Mizoramin neih a tulzia a sawi tel bawk.

NEC hnuaiah hian kum kalta chhung khan Review Meeting vawi 13 a vaiin neih niin, project 118 thawh zawh a nih thu a sawi a. 2019-20 Annual Plan a NEC hmalakna hrang hrang atana pawisa dah chu a vaiin Rs. 1476.10 crores a ni. Hmalakna chi hrang hrang zingah India hmarchhak state a Aspirational District khaikan chu ngaihpawimawh zing a mi a ni.

NEC Plenary-ah hian North East State a Chief Secretary te leh Planning Secretary te an tel hlawm a. Mizoram atang pawhin Chief Secretary Pu Lalnunmawia Chuaungo, Planning Secretary Dr.C. Vanlalramsanga leh official dangte an tel a ni.