Vawiin khan North Eastern Council (NEC) meeting vawi 66-na chu New Delhi ah neih a ni a, he meeting pawimawh takah hian Chief Minister Pu Lal Thanhawla pawh Hmarchhak state dangte Governor leh Chief Minister-te ruala telin thusawina hun a nei a ni. 

Chief Minister Pu Lal Thanhawla chuan a thusawiah nikum a NEC meeting vawi 65-naah North Eastern Council kal zel dan tur hmathlirna Prime Minister Pu Narendra Modi in a neih chu kum khat a ral hnuah pawh thil tih tak tak a awmlo nia a hriat thu te, he thilah hian DoNER Minister leh NEC Chairman te chu Prime Minister hmathlirna tihlawhtling turin a ngen a, NEC dinchhan tih hlawhtlin anih theih nan hmathar lak a tul thu te leh Hmarchhak mipuiin Prime Minister chunga beiseina sang tak an neih thu te a tarlang. 

NEC sum mamawh ang ruahman a, pek a tul thu sawi langin sum pek chhuah a tlem avangin duh angin hmasawnna hna a thawh chak theih loh tih sawiin Kum thum atana cheng vaibelchhe 7500 vel Draft Plan, Council hmaa pharh chu NLCPR sum tling khawm atanga pek nise tiin a rawt a, mahse sum mamawh tunah pek dan anga pek chhunzawm anih chuan Regional Plan hian awmzia a nei thui thei lo nia a rin thu a sawi. 

Ministry of DoNER Budget Estimate-ah NEC Scheme-te, Central Sector Scheme anga kalpuia, a sum pawh State Sawrkarah chhung lut lovin Sawrkar Laipui ina a ruat Designated Agency te hnenah chhunluh anih chuan Finance Ministry remtihna laka, State Implementing Agencies hnena chhunluh chu thil tha zawk a ni thei tiin he ruahmanna thar hi uluk leh ngun taka ngaihtuah a tul tih a sawi a. Sawrkar Laipuiin CCS hnuaia sum te chu Central Agencies emaw, State Implementing Agencies emaw teah chhunglut lovin Consolidated Fund Of India kaltlanga state sawrkarah a pek tawh laiin NEC sum, heng Central Agency leh State Implementing Agency-te a chhunluh rawtna awm hi zirchian a tul tih  a sawi a. Ruahmanna tharah heng project enpui, thlithlai leh audit lamah harsatna a awm a rin thu a sawi bawk a. Chuvangin a kalpui dan pangngaia kalpui chu tha a tih thu a tarlang. NEC atana project siam thei a tlem lam, cheng nuai 1000 a bithliah ruahmanna awm chu tha a ti lo tih sawiin Hmarchhaka ramri dep hmun kilkhawr leh hnufumah te project tenau ten pawimawhna leh tangkaina a la nei viau a, chuvangin project tlem lam bithliah ruahman chu kaltlangpui tha a tih lo thu a sawi. NEC sum pek atanga state huang chhunga Priority Project-te thlanfel chu State Sawrkar kutah liau liau dah nise tiin a rawt a, mahse regional project te thlan chu State sawrkar te indawrna leh State Sawrkar-te remtihna angin tih nise tiin a rawt bawk a ni. 

Act East Policy chungchang sawiin Chief Minister chuan he ruahmanna hian Hmarchhak state te, South East Asian ecomomy thang mek te nena inthlunzawma, sumdawnna hmanga Hmarchhak tihhmasawn kawngah beiseina a pe a, mahse kum kum 20 a ral hnu pawhin Hmarchhak bial economy-ah hmasawnna tih tham nghawng sawi tur a awm lo, a ti a. He thil ruahman leh kalpui zel danah Hmarchhak state sawrkar te chu rawn tha a tih thu a sawi a. He policy a hlawhtlin nan Hmarchhak atanga thil thawnchhuah theih zirchian te, chumi atana ruhrel pawimawh siam te leh man man zawka thil siamchhuah leh dehchhuah kawng siam te chu thil tul nia a hriat thu tarlangin a hmang tangkai tur stakeholder hrang hrangte hnenah hengte hi hrilhriat a ngai takzet ni a ti bawk a. Myanmar nena ramri depa insumdawntawnna hmun awmsaah te sumdawnna chu hriatpuina leh hriatpuina tel lovin kalpui mek a ni tih sawiin khawtlang leh economy chawisan(socio-economic upliftment) anih theih nan heng te hi dan anga kalpui ‘institutionalize’ a tul tih a sawi bawk. 

Hmarchhaka hmasawnna thanmawh bawk lian ber leh a economic potential haichhuahna kawnga daltu lian ber chu inkalpawhna duhthusam la awm lo hi a ni tiin Hmarchhak state hrang hrang te chu nasa zawka kawng hrang hranga inthlunzawm a tul tih a sawi a. Tuna mamawh leh pawimawh ber chu kawng thar sial, a awmsa te tih changtlun leh thawmthat a ni, a ti a. Ministry of DoNER leh NEC te hnathawh leh tum chu thil thuhmun nimahse Hmarchhak hmasawnna atan an thawh chin a inkalhthelh loh nan an thawh leh tih tur chiang taka enfel chu thil tul nia a hriat thu sawi a ni.