Mizoram Governor Lt Gen Nirbhay Sharma, PVSM, UYSM, AVSM, VSM (Rtd) chuan May ni 29-a New Delhi-ah 66th NEC Plenary Session leh May ni 30 khan Indian Chamber of Commerce leh Ministry of External Affairs tangkawp buatsaih ‘Kolkata Dialogue 2017’ kharna inkhawm a hmanpui hnuah nimin khan Aizawl a lo thleng.

Pravasi Bharatiya Kendra, New Delhi-a 66th NEC Plenary Session neihnaah Mizoram Governor chuan thusawiin Mizoram leh hmarchhak bial hmasawnna tura hmalak dan tur a tarlan zingah Lengpui Airport chu India leh South East Asia inthlunzawmna tura hmun pawimawh berte zingah hlankai a rawt a. Sorkar laipuiin a kalpui mek ‘Vision 2020’ hnuaiah hian hmarchhak bial tihhmasawnna turin sum vaibelchhe nuai 30 vel mamawh a ngaih tur thu te, hmarchhak bial chu eco & medical tourism lamah nasa takin cheibawl theih a nih thu leh mihring chhawrtlaka chherchhuahna skill development lamah nasa zawka hmalak a tul thu te a tarlang bawk. NEC leh DoNER hnathawh dan hi thenfel chian a tul thu sawiin Pu Nirbhay Sharma chuan DoNER chuan policy leh sum pekchhuah dan enkawl se, NEC chuan planning leh monitoring enkawl thung se a that zawka a rin thu a sawi bawk.

ICC leh MEA tangkawp buatsaih ‘Kolkata Dialogue 2017’ kharna inkhawm The Oberoi Grand, Kolkata-a neihah Mizoram Governor chu Khuallian niin sorkar laipuiin ‘Act East’ a kalpui mekah hmarchhak bial pawimawhna leh hmalakna tura a hriat thil engemawzat a tarlang a. Hmarchhak bial chu rampum hmun zaa 8% a nih laiin a mihring cheng tam zawkte chu tribal niin rampum huapin zaa 4% chauh an ni a, ramin zalenna a sualchhuah hnuah British awpna hnuaia ramri leh inkalpawhna hrang hrangte chu tihdanglam a nih khan nasa takin a nghawng a ni, a ti. Hmarchhak bial ramri zaa 98% chu international border a nih avangin helai bial hi India leh South East Asia nena insumdawn tawnna turah pawh hmun laili leh pawimawh ber a nih dawn avangin nasa taka tihhmasawn chu tihmakmawh a ni, a ti bawk. Hmarchhak bial tihhmasawnna kawngah hian ramchhunga sumdawng leh pawl lian ten hma rawn la se, a ram mawina leh hausakna hman tangkai dan tur leh he biala chengte pawh chher dan tur kawng hrang hrangah hma rawn la zel turin a chah bawk.

 

Attachment

  • Loading attachment...