Nimin khan Education Minister Pu H.Rohluna chuan Chhawrtui a SSA sikul leh Vanchengpui khua a RMSA Sikul sak lai chu a hmunah kalin a endik.

Education Minister, bialtu MLA ni bawk chuan Sikul sak lai mek te chu an sak dan endikin Sikul building ina a mamawh tur inthiarna, zun in, tuihawk luankawr siam, sikul panna kawng siam that, zirtirtute chhenna Staff Quarters sak chungchang te chu Education Department lam Official te leh Sikul zirtirtute nen an sawiho a. Hemi bakah hian sikul buiding sak lai mek chu a hun taka zo turin a hriattir bawk a ni. Minister chuan vanchengpui khuaa NEDP atanga kawng siam Metre 70 vela thui Concrete Filled Road chu a endik bawk a ni.

Minister chuan zirlai leh khawtlang hruaitute hmaah zirna pawimawh thu sawiin “zirna tello chuan hmasawnna a famkim theilo” a ti a. Mizoram Sawrkar in Zirlai te tan Textbook tha tak  (NCERT) a chhawpsak thu tarlangin Zirtirtu indaih lohna pawh sawrkar in hma a lak mek zel thu a tarlanga, hetih rual hian zirlai naupangte chu zirtitute leh nu leh pa te thuawi a taima taka lehkha zir turin a chah a ni. Social Media: Facebook, watsapp leh thil dang te chu hman dan chintawk hre turin zirlaite chu a fuih a, zirtitute pawh Integrated Evaluation Scheme (IES) chu rinawm taka hmangin, induhsakna hleiluak emaw naupang duhsaklo bik neilo turin a chah a, Naupangte chu uluk taka enkawlin an phu tawk mark pe turin a chah bawk a ni. Minister chu Sikul zirlai Naupangte leh khawtlang mipuiten lo hmuakin, Khawtlang leh Zirlaite aiawhin Zirtirtute chuan zirna ngaipawimawh tak Bialtu MLA an nei chu vanneihthlak an tih thu sawiin bialtu MLA chu a hmalakna ah lawmthu an hrilh bawk a ni.

Chhawrtui khua a SSA Sikul sak mek hi SSA fund leh Bialtu MLA fund atanga sak niin Vanchengpui khua a RMSA sikul sak mek hi RMSA fund atanga sak a ni.

Education Minister hi School Eduaction Department Officials, Pu VL Malsawma, Dy SPD (P) RMSA Aizawl, Pu C Lalthanzira SDEO Khawzawl, Pi Lalsiamliani DPC SSA Champhai leh midangten an tawiawm a ni.