May ni 30-a thlipui "Cyclone Mora" tleh khan Lawngtlai District chhung hmun hrang hrangah chhiatna a thlen nual a. Lawngtlai khawpui chhung bika chhiatna thlenna hmun thenkhat chu Lawngtlai Bawrhsap Dr A. Muthamma IAS chuan nimin chawhnu khan a tlawh. 

Lawngtlai DC hi Election Officer Pu Lalrinawma, Lawngtlai BDO Pu Zoramsiama Hmar leh DIPRO Pu C.Lalhruaitluanga te'n an tawiawm a. Chhiatna thlenna zingah Lawngtlai Electric venga P&E Office bul lei minin Pu CT Hengduna in a tihchhiat te, Bazar veng atanga Electric veng pan chhohna kawng khi leh a vel lei che te, L-III-a LADC Industry building thlang lei min leh Pu R.Liansanga in bul lei min te an en a. Chhiatna nasa zawk a thlen zel loh nana hma lak nghal dan tur leh harsatna dang awm thei chin fel zui dan tur te sawi hovin, a tul apiang bawhzui nghal tura ruahman a ni. 

He thlipui leh ruahpui vanga Lawngtlai District chhunga chhiatna thleng hrang hrangte en zuia a tul anga hma la tur hian Lawngtlai DC chuan block hrang hranga BDO te a hriattir tawh a. Lawngtlai District  Disaster Management Authority leh block tina BDO te hian hma an la chho mek a ni.

Attachment

  • Loading attachment...