Tukin zing dar 7:00 khan Serchhip DC pisa tual atangin Bawrhsap Pi Sangchhin Chinzah chuan Missions for Integrated Development of Horticulture hmanga Serchhip District Horticulture Department ten fur Zikhlum leh fur Tomato an kui tiah chu a chingtu tur loneitute hnena pek turin a vai liam. 

Pi Sangchhin Chinzah chuan, Zikhlum leh Tomato te chu thlasik thlai an ni a, kum tluanin kan mamawh bawk si a. Fur laia chin theih tura ruahman leh kum tluana kan mamawh zat thar tura theihtawp chhuah chu thil tul tak a ni, a ti a. Horticulture Department ten District chhunga chhungkaw tam tawk takte chin tura hetianga a tiak an nei chu a lawmawmin hlawhtling taka kan tharchhuah theih chuan ram tan hmasawnna rahbi hlu tak a tling dawn a ni, a ti a. Serchhip Horticulture thawktute thawhrimna chu fak tlak nia  a hriat thu a sawi a ni. 

He hun kaihruaitu Pi  Margaret Vanlalzami, DHO Serchhip chuan, sawrkar laipuiin kum 2022 a loneitute sum lakluh a leta tihpun a tumna kal zelah he hmalakna hi kalpui a nih thu sawiin fur laia state pawn atanga kan chawkluh nasat em em zikhlum leh tomato chu a chi tha bik, ruahtui tam lai pawha damchhuak ngei tur chu Serchhip Horticulture Centre af Excellent ah kui tiah niin loneitute hnenah semchhuah tan a nih thu a sawi a. A chi man hi a to em avang leh a kim thei ang bera kui tiah ngei kan duh avangin a chia sem lovin a tiakin kan sem ta a ni, a ti a. Serchhip District chhungah a chingtu tur hlawm ruk (cluster 6) Hualtu, Hmuntha, N. Vanlaiphai, Serchhip, Baktawng leh Serchhip a chhungkaw thlan chhuah hnenah pek an nih tur thu a sawi a. Zikhlum hi chhungkaw 200, Tomato hi chhungkaw 100 ten an ching dawn a ni. 

Pi Lucy Zaithangpuii, Horticulture Development Officer chuan technical report a pe a. Zikhlum hi Japan Variety Ryozeki a ni a, Tomato hi Arka Rakshak leh Arka Samrat a ni a, kumin bik atan zikhlum hi tiak 20 lakh, Tomato hi tiak 5 lakh vel mamawh a nih laiin Horticulture Centre ah hian tum khatah tiak 4 lakh vel chauh kui tiah theih a ni rih a, mahse a tiak hmasa te semchhuah rualin a thar kui leh nghal zel a ni ang. Hei hian a hralhna lamah pawh a chingtute tan awlsamna a thlen theih zawk beisei a ni, a ti. Tukin zinga Bawrhsap in a vai liam hi Hualtu hlawmah vawiin hian sem nghal a nih tur thu a sawi bawk. 

Tukin a Fur zikhlum leh Tomato tiak vailiamna hunah hian Serchhip NLUP Line Department hrang hrang hotute, Chanchinbumite leh Horticulture Department a thawktute an tel a ni.