Nimin ah khan hna pawimawh thawk tura Mizoram rawn tlawhtu, Pu Ram Muivah, Secretary, North Easter Council(NEC) chuan Aizawl a rawn thleng a. Nimin tlaiah khan Governor Lt Gen. Nirbhay Sharma, Retd. nen Raj Bhavan an an inkawm a, tukin chawhma ah khan Chief Secretary Pu Lalmalsawma nen inkawmna hun an nei leh nghal a ni.

Pu Ram Muivah, Secretary , NEC chuan Governor Lt Gen. Nirbhay Sharma, Retd hnenah Mizoram a rawn tlawh chhan te chu chu hrilh in NEC Budget len zawng, Fund an pek chhuak dan kalhmang, NEC in a dah pawimawh bik te leh an hmalak dan kawng hrang hrang te a hrilh a.Theihtawp an chhuah chung pawh in an chhut lawk ang leh beisei aia tlem zawk sum an hmuh avanga hmalakna tam tak tihpuitlin theih a ni lo chu pawi a tih thu sawi a. An harsatna te sutkian a nih theih nan theihtawp lo chhuah sak turin Mizoram Governor chu a sawm a ni. Mizoram Governor Lt Gen. Nirbhay Sharma, Retd. chuan NEC chu Hmarchhak biala mite puala NITI Ayog tenau zawk a ni a ti a. NEC in Mizoram tan hmasawnna ruhrel tam a din sak tawh avanga lawmthu sawiin Mizoram chhunga Automous District 3 te chu District hnufual an nih anga ngaihsak an tul thu NEC Secretary hi a hrilh a ni.

“ACT East Policy avangin North East State te chu Asia ram dang te tan sumdawnna kawngpui a ni thuai dawn a. Sumdawnna kalkawng dung awm nih a tawk lova sumdawnna hmun nih a ngai a. State lian zawk te siamchhuah sa thawnchhuahna kalkawngpui nih ringawt hi hmarchhak bial mipui ten kan hlawkpui dawn lova. International Border pela thawnchhuah tur Mizoram ah leh hmarchhak states ah te kan siamchhuah mai bakah kan thalai te International Trade ah sumdawng thiam turin kan zirtir a ngai. NEC pawh in he thil ah hian hma la thei se ka duh hle a ni”, tiin Governor chuan NEC Secretary chu a titi pui a. Mizoram khawthlang lam ramri dung tluan chu hung tawh a ni thu sawiin he mi hruala kawngpui pawh NEC chuan sumdawnna kaihhnawih thil ah lo chhinchhiah sak se a duh thu tarlang in kawngpui tha siam hna nasa zawka Mizoram tan thawh sak turin ngenna a siam bawk a ni.

Pu Ram Muivah, NEC Secretary chuan NEC in hmarchhak mite tan theihtawp a chhuah mek thu sawiin tun din hmunah Border Roads Organisation chauhvin a thawh theih project hmarchhak bial a hmun pakhat ah kalpui mek a nih thu a tarlang a. Chutiang project chu Mizoram a BRO ten an thawh ve theih thu a tarlang a. Governor chuan Mizoram a BRO te a rang lama hmalaktir an nih tur thu a lo hrilh a ni.

Vawiin chawhma ah khan Chief Secretary Pu Lalmalsawma leh Secretary dang ten en inkawm leh in NEC Secretary Pu Ram Muivah chuan an inkawmna ah hian NEC in Fund pekchhuah a harsat chhan chu Central atanga an sum hmuhtur aia tlem zawk an dawn vang a nih thu a tarlang a. NEC chuan a sum kawl leh hmuh theih awm chhun te chu Kawngpui siam nan hman chhunzawm a ni anga, Medical College, Skill Development leh Hmarchhak bial chhunga School of Architecture pakhat tal din nan hman a tum a ni bawk ang a ti. School Education Minister Pu H. Rohluna’n Mizoram Education Reforms Commission tihpuihtlinna tur a sawipui chungchang pawh Chief Secretary hi hrilh in hmalak chhunzawm dan tur an sawi dun nghal a ni.