Vawiin khan Lunglei District NLUP Committee chu an Chairman Deputy Commissioner, Lunglei Pu Abhijit Vijay Chaudhari, IAS hovin ama office chamber-ah an thukhawm a; inhmelhriatna hun leh line department hrang hrang hnuaia hmalakna awm tawhte an sawiho.

Meeting hawnnaah DC Pu Abhijit Chaudhari chuan line department hotute lo lawmin, an hmalakna leh harsatna tawh hrang hrangte report turin a sawm theuh a. Mizoram sorkar flagship programme a nihna angin NLUP hnuaia hmalaknate chu nasa lehzuala bawhzui a, beneficiaries-te thawh dan ngun lehzuala vil a pawimawh thu a sawi. Kumin January ni 14-a 'Farmer's Day' puala Mizoram sorkar leh DDK tangkawpin programme an duan 'Hmasawnna Lamtluang' ah Lunglei District chhunga sorkar hmalakna a tam theih ang ber tihlan a nih theih nan tan la turin Committee member-te a chah bawk.

NLUP hnuaiah hian Lunglei District hi Cluster 7-ah then niin 1st Phase-ah Beneficiaries mi 7106 an awm a; 2nd Phase-ah mi 7408, 3rd Phase-ah mi 5079 leh 4th Phase-ah mi 2659 thlan an ni.

Line Department-te chu Agriculture, Horticulture, AH&Vety, Fisheries, Sericulture, Environment & Forests, Soil & Water Conservation leh Industries Department-te an ni a; an hnuaia NLUP trade hrang hrangte chu hengte hi an ni :

1. Agriculture : WRC-I, WRC-II, Red Oil Palm & Sugarcane

2. Horticulture : Passion Fruit, Grape, Mango, M. Orange, Pineapple, Iskut, Aloevera, Areca Nut, Tung & Tea

3. AH&Vety : Dairy Cow, Piggery, Poultry & Mithun/hill cattle

4. Fisheries : Fish farming

5. Sericulture : Silkworm rearing

6. Environment & Forests : Bamboo Plantation

7. Soil & Water Conservation : Rubber Plantation, Broom Plantation, Coffee Plantation

8. Industries : Micro-Entreprise-I & II, Handloom.