Vawiin khan North Eastern Council Secretary Pu Ram Muivah, IAS hovin Secretariat Conference Hall, New Secretariat Complex-ah sawrkar mi pawimawhten NEC kaltlanga Mizorama hnathawhte an thlirho.
Meeting hi NEC Secretary chuan kaihruaiin Mizoram Chief Secretary Pu Lalmalsawma chu Co-Chairman a ni a. Kum kalta December 2015 thlenga NEC sum hmanga Mizoram chhunga scheme leh project hrang hrang kal mek te dinhmun thar ber an thlir ho a ni. Mizoram sawrkara Department hrang hrang sawmpariat te chuan NEC sum hmanga thawh hna kallai 57 an nei a. Heng zingah hian sawmpathum chu thawh zawh thawkhat tawh niin 44 te hi thawh mek an ni. Scheme leh project 57 thawhna tur hian NEC chuan Rs. 845.93 crore a pawmpui tawh a, NEC leh State in a do letna sum a pekchhuah tawh zat chu Rs.525.15 crore a ni. Utilisation Certificate submit tawh zat chu Rs. 457.38 crore hu zet a ni.
NEC Secretary Pu Ram Muivah hian project thawh lai mek dinhmun enpuiin department tinte hnathawh dan chu tha a ti a. Sum mamawh rang zawka pekchhuah a nih theih nan NEC a thehluh tur thil pawimawhte a rang lama thehlut thin turin department hotute a hriattir a ni.
NEC Secretary hi North East Rural Livelihood Project (NERLP) Project Director HK Hajong in a tawimawm a. Meeting-ah hian Principal Secretary to Chief Minister Pu Lal Ramthanga, Planning Secretary Pu C.Vanlalramsanga bakah Department hrang hrang Secretary leh Directorate te an tel a ni.
Vawiin vek khan Pu Ram Muivah chuan Information & Public Relations Directorate, Treasury Square a tlawh a. He department in Multifacility Centre atana DPR a siam chu NEC hian retention turin a lo pawmsak tawh a, a hming erawh thlak tura a hriattir angin Lianchhiari Run tiin thlak a ni. Lianchhiari Run project kal tlang hian mini film theatre te; flower show, handloom leh book fair neihna tur bakah mi hrang hrangin an thil siam chhuah an pholan (exhibit) theihna tur permanent exhibition venue te leh lirthei za chuang zet hun theihna tur car & 2 wheeler parking chhawng hnih siam tum a ni a. NEC Secretary hian a hmunhma endikin tha a tih thu leh Mizoram mipuite mamawh leh hman tangkai theih tur nia hriain a hlawhtlin nan theihtawp chhuahpui a tum thu a sawi a ni.
