Vawiin hian Social Welfare Minister Pu PC Lalthanliana, Horticulture leh Local Administration Department changtu ni bawk chuan Lawngtlai kianga Eklavya Model Residential School (EMRS) sakna hmun tur a tlawh a, Minister of State for AH & Vety, Pu C. Ngunlianchunga’n a tawiawm.

Ministry of Tribal Affairs atangin tunah hian Chawngte, Lawngtlai leh Tuipangah te Eklavya Model Residential School (EMRS) sakna tur sum Rs 2 Crore theuh hmuh tawh a ni a, heng sum state in a dawn tawhte hmanga bul tan vat a nih theih nan a hmun tur enfiaha kal a nih thu sawiin Pu PC Lalthanliana chuan, hetia a hmun tur ram tha kan neih fel tawh chuan a panna kawngte, a hmunhma chulmam hnate thawkin bul kan tan nghal mai dawn a ni, a ti.

Eklavya Model Residential School hi Ministry of Tribal Affairs in tlang mi (tribal) mirethei ten a thlawn liau liauva zirna tha an dawn theih nana a ruahman a ni a, Class 6 atanga Class 8 thlenga bul tan a, class tinah naupang 60 theuh, mipa leh hmeichhia a inzatin kaltir phawt tur a ni a. Chumi hnuah kumtin Class ti sang chho zelin Class 12 thlenga hawn tur a ni. Hostel leh Infiamna hmunte changtlung taka siam vek an ni ang. Lawngtlaia he School dinna tur hmun hi Lawngtlai atanga Km 3 vela hla, Chawnhu khaw kianga Zotlang ram, LADC FOREST PARK chhunga mual pakhat chu LADC in phal takin an hman tir dawn a ni. Minister hian nimin lamah Chawngtea EMRS hmun tur a lo en tawh a, tunkar chhungin Tuipanga a hmun tur pawh en nghal a tum dawn a ni.

Vawiina Minister in EMRS hmun tur a tlawh hian Pu C. Ngunlianchunga bakah Lawngtlai Bawrhsap Pu J. Hmingthanmawia, LADC CEM PU VL Hmuaka, EM Pu Chhuanawma leh Official pawimawhten an tawiawm a ni.

Hemi hnu hian Pu PC Lalthanliana hian Lawngtlai District Child Protection Unit Office te, CDPO te leh District Horticulture Office te tlawhin hnathawktute nen inkawm hona an nei bawk.

Attachment

  • Loading attachment...