Tukin zing khan School Education Minister Pu H. Rohluna’n North Eastern Council (NEC) Secretary Pu Ram Muivah, IAS chu Aijal Club-ah Education Reforms Commission (ERC) tihhlawhtlinna tur a sawipui.

Pu H.Rohluna chuan NEC Secretary hi titipuiin Education Reform Commission rawtna tihhlawhtlinna atana sum mamawh dan a sawipui a. NCERT Director pawh lo ni tawh zirna lama mithiam Prof A.K.Sharma hova Education Reform Commission din a nih dan te, report an thehluh hnuah Group of expert ten an report chu an zirchian leh thu te a hrilh a. Commission rawtna engemawzat chu tihhlawhtlin anih tawh thu leh tuna hmabak la awm infrastructure tihhlawhtlinna atan sorkarin sum a mamawh dan te a hrilh a. Pu H.Rohluna chuan infrastructure lamah hian mamawh hmasa chu school building lam ai mahin zirtirtute quarters anih thu a sawi bawk.

Parliamentary Secretary Pu Joseph Lalhimpuia pawhin Tata Trust nen tangkawpa School Education Dept. in Science, Maths leh English zirna (CLIx) kalpui tan anih thu te, NEIDA nen thawkhovin Football Academy pawh tan thuai tur anih dan te sawiin NEC chu a theih ang anga puibawm turin a ngen bawk a. Pu Mahima chuan Education Reform Commission tihhlawhtlinna atan hian Doner Minister hnena a thlen chu Minister hian ngaihtuahna an hman reng lai anih dan ziaka a rawn hriattir thu a sawi bawk.

NEC Secretary Pu Ram Muivah IAS chuan charge a lak ve chauh thu leh ERC rawtna tihhlawhtlinna tur chu priority list-ah rawn tarlan leh ni se a ti a, a tul anga lo bawhzui a tum thu a sawi bawk. Planning Secretary Dr C.Vanlalramsanga pawhin ERC chu NEC planetary session-ah pawh sawilan anih tawh thu leh state sorkarin a ngaih pawimawh thu a sawi a, a thawh khatna chu release phawt tur leh a bak chu thensawma a tahtawla kalpui tur anih dan a sawi bawk.

NEC Secretary hi a nupuiin a tawiawm a, School Education Minister hi Parliamentary Secretary Pu Joseph Lalhimpuia, Secretary Pu P.Lalchhuanga, Director Pu K.Lalthawmmawia, Planning Secretary Dr C.Vanlalramsanga leh SSA SPD Pu Lalhmachhuana ten an tawiawm a ni.