Vawiin khan SSA Mission Champhai District Education Committee chu an Chairman DC Pu Vanlalngaihsaka hovin DC Conference Hall-ah a vawi 28-na atan an thukhawm.

DC chuan Sorkarin zirna lama hmasawnna kawngah mipuite zangkhai zawk nan kawng hrang hrangah puihna leh sum sen tam ngai lova zirtirtu train chhuah vek kaihhuaina hnuaia zirna pe tura ruahmanna a siam chu mi tam zawkin a hlutna kan hriat tha a tih thu a sawi a. Enrollment a tam theih nan result lamah hmasawn zel tura hmalak a tul thu a sawi bawk.

Meeting-ah hian kum 2016-2017 chhung atan Draft Annual Plan leh Budget duan lawk te chu chipchiar taka sawiho a nih bakah kum 2015-2016 chhunga hmalakna te thlirho a ni a. Elementary School-ah Text Book thar hman anih dawn avangin zirtirtute tan training buatsaih te leh zirlai rualbanlo te tan Inclusive Education Resource Room sa tura ruahmanna siam leh Midday Meal kalpuina atan sum lo kal dan leh hman a nih dante sawiho a ni bawk a.

Champhai District chhungah hian School 276-a zirlai naupang 16,163 hnenah Midday Meal hi pek thin niin, chawchhumtu 555 rawih an awm a. Cook hlawh tur hi a hranpa a fund lo kal dan azir zel a pek a nih thin avangin fund lo kal veleh pekchhuah thin ni mahse dawn tlai vanga hlawh inpek har chang a awm thin tih meeting-ah hian tarlan a ni.

School Education Department thuchhuakin a tarlan dan in Mid Day Meal (MDM) sum enkawltu a hman thin Village Education Committee (VEC) chu School Management Committee (SMC)-a thlak a ngai tawh a. District Level-ah kalphung thar hmang tawh turin tunah hian hmalakna kalpui mek a ni bawk a. Hemi hnuaiah hian SMC Chairman leh Secretary te chuan MDM Joint Account an hawng thar ang a, SMC SSA Accounts an hmang dawnlo a ni.

Vawiin meeting-ah hian SSA hnuaia zirlaibu leh uniform a thlawn a sem thin anih dan chungchanga inkaihhruaina Sorkar thuchhuak sawifiah niin, a thlawn a sem tia sawi a nih thin rualin Sorkar chuan Primary School zirlaibu ah cheng 150 leh Middle School zirlaibu ah cheng 250 chin a tumsak thu leh, uniform-ah pawh set hnih atan cheng 400 Sorkarin a tum sak thu sawifiah a ni.

Kum 2015-2016 chhung khan Champhai District SSA Mission hnuaiah hian zirna school awmlohna khua zawng zawngah school hawn vek niin zirtirtu 188 dah a ni a. Vohbik naupang 993 enkawlna turin December 2015 thleng khan Rs 10,77,540 hman ral tawh a ni a. Zirlai zawng zawng hnenah zirlaibu leh uniform pek a ni bawk. BPL leh AAY chhungkua ami zirlai hmeichhia te tan awmna tur Residential Hostel, seat 50 awmna chu Govt. Vengthlang Middle School, Champhai compound-ah kum 2006-a din a nih kum atang khan kumin thlengin tangkai taka hman a ni a. Heta awm tur a dilna hi interview hmanga lak niin, zirna pangngai bakah puan thui zirtir an ni bawk a. Naupangte hi a thlawna chawm, enkawl leh zirna pek an ni.

Vawiin meeting-ah hian Committee Member-Secretary Pi K. Lalsiamliani, DPC SSA leh member te an tel kim hle a ni.