Vawiin khan North Eastern Council (NEC) Secretary Pu Ram Muivah, IAS chuan Chitea Integrated Horticulture Training Centre (IHTC) atana Horticulture Department hmalakna hrang hrangte leh Sihphir khuaa North East Rural Livelihood Project (NERLP) hnuaia Self-Help Group (SHG) hrang hrangte hmalakna a hmunah a tlawh a.

NEC Secretary, Pu Ram Muivah, IAS hi Chitea Horticulture Department hmalakna hrang hrangte fan pui a niin, an harsatna hrang hrangte a ngaihthlak sak bawk. NEC Secretary chuan Mizoram Sawrkarin NEC Project hrang hrangte a kalpui tha thawkhat hle tih sawiin project delay phei chu a awm meuhlo ni, a ti a. Hostel building leh Training hall tur sak tharte bakah, serthlum leh balhla chi leh tiak sawngbawlna a hmunah en in, Mizoram sawrkarin hemi atana project a thehluh hunah pawh lo hriat zui zel a tum thu a sawi bawk. Plant Tissue Culture leh Citrus Scion Bank-te chu state dangah pawh kalpui uar se a duhthu sawiin, Mizoramah pawh chakzawka hmalak a nih theih nan NEC hnuai mai bakah Indian Biodiversity hnuai atanga project hmuh tum turin a chah bawk.

Chitea IHTC a tlawhnaah hian Pu Ram Muivah hi a nupui bakah Horticulture Department Secretary leh official engemawzatin an tawiawm a. IHTC-a thawktute leh zirlai, training nei mekten lo dawngsawngin an hmalak dante an lo hrilhfiah a ni.

Tunah hian BFIT Group of Institution (Dheradhun), Dolphin (PG) Institute of Biomedical and Natural Sciences, leh Doon PG College of Agriculture Science and Technology atangtein zirlai training an awm mek a. Heng bakah hian Pachhunga University College nen pa khawi zirna lama thawh dunna thuthlung an neih bakah university thenkhat nen inremna thuthlung ziak tura hmalak mek a ni bawk.

Chitea IHTC a tlawh hnu hian NEC Secretary chuan Sihphir khua a tlawh leh a. Hetah hian NERLP hnuaia SHG-te hmalakna a hmunah en in beneficiary-te harsatna leh rawtnate a ngaihthlak sak a. Kuthnathawktuten sum tlemte hmanga eizawnna bul an tan thei leh hlawhtlinna an chang thei chuan min tihlim hle a ni, a ti. NERLP Project Director Pu H.K. Hajonga chuan beneficiary-te tan a training an buatsaih thin dan a hrilhfiah bawk.

NERLP hian Aizawl leh Lunglei district chhunga mi harsa tak takte eizawnna bultan nan SHG kaltlangin loan a pe thin a. NERLP hnuaiah hian miharsate dawmkan nan Aizawl District-ah Rs. 16,75,60,463/- leh Lunglei District-ah Rs. 20,09,47,394/-, lai an pe chhuak tawh a ni.