Parliamentary Secretary i/c Finance, Planning, etc. Pu KS Thanga chuan vawiin khan Mizoram State Referral Hospital (Medical College thar tur) leh Mizoram College of Nursing, Falkawn a tlawh a. State Referral Hospital-a doctor-te leh thawktu dangte nen meeting an nei nghal.

He meeting-ah hian Pu KS Thanga chuan thu sawiin, Congress sorkar hnuah Aizawl South-III bial chhungah hmasawnna tam tak a thleng tawh a ni, a ti a. Mizoram tana rotling tur Medical College a bial chhung Falkawn-a dah tura sawrkarin ruahmanna a siam chu Mizoram mipuite leh a bik takin Aizawl South-III bial mipuite tan a lawmawm leh zual a ni tiin, duhthusama changtlung sa ni rih lo mah se, hma sawn zelin India ram state dangte hriat tham Medical College a la ni ngei ang, a ti a. Chak taka hma latu Chief Minister leh Health Minister te chungah lawm thu a sawi nghal bawk.

He Medical College puitlin chhoh zel nan hian High Level Committee siam a ni a. Chief Minister chu Chairman niin, Chief Secretary chu Member Secretary a ni a. Chief Minister-in a ngaih pawimawh avangin Finance Minister pawhin theihtawp a chhuah a. Medical College tihpuitlin nan hian a tul angin hmanraw tha zawk dah zel a ni ang a, sum pawh a awm zel ang tiin, Pu KS Thanga chuan ramin a mamawh bik thilah chuan sawrkarin sum a nei a, tul lova hman tur erawh a nei lo, a ti a. Medical College puitlin nan chuan sawrkarin a tul anga hma lain, an mamawh chu a pe zel ang, a ti.

Pu KS Thanga chuan doctor-te leh thawktute fuihin, ram tana rotling tur thilah chuan Politician-te’n inchirh theh nan an hmang a nih pawhin chi-ai lo va, damlote leh Medical College puitlin zel nan theihtawp chhuah turin a chah a. A hnenah hian Medical Officer-te pawhin an mamawh an lo thlen bawk a ni.