Nimin tlai dar 5:00pm khan Rs. 1,05,65,000/- senga sak Chawnpui Sports Center chu North Eastern Council (NEC) Secretary Pu U.K. Shangma IAS in a hawng. Hawnna inkhawm hi Pu R.L. Rinawma IRS, Commissioner & Secretary, Sports & Youth Services in a kaihruai a ni.

Pu U.K. Shangma chuan NEC atanga sum an hmuhte tha taka hmanga hna tha taka an thawh avangin Chawnpui Veng YMA a fak a, NEC fund hmanga sports center tha tak sak a ni chuan a tilawm hle tih a sawi a ni. NEC in Mizoramah infiamna chi hrang hrang - boxing te, taekwando leh a dangte a sponsor thin tih sawiin a la sponsor chhunzawm zel dawn thu a sawi bawk. Pu U.K. Shangma chuan Mizorama project chi hrang hrang atan NEC a inhawn thu sawiin Prime Minister Office in Rs. vaibelchhe 2 aia tlem sanction a phalsak tawh loh avangin NEC-a project thehlut turte'n an project an tih len a tul a ti bawk.

Chawnpui Sports Center hi 1073.28 sq. m a zau a ni a; a building tak hi 1008 sq. m (36 m x 28 m) niin a hmalam hulhliap hi 65.28 sq. m a zau a ni. Sports Center chhungah hian mi 700 lenna gallery leh 731.51 sq. m (35.85 m x 20.6 m)-a zau Acolade carpet phah thlap Basketball Court a awm a, mipa leh hmeichhe tan Green Room hran ve ve a awm bawk.

Chawnpui Sports Center sakna atan hian project estimate Rs. nuai 80 siamin ni 4.8.2004 khan NEC-ah DPR thehluh a ni a. NEC atang hian original estimate atangin Rs. nuai 62.65 hmuh niin additional estimate Rs. nuai 43 hmuh leh a ni a; a vaiin Rs. nuai 105.65 hmuh a ni. Sports Center hmun hi hnatlanga laih zawl a nih hnuah ni 31.3.2007-ah bankhur laih tan a ni a, he Sports Center sak zawh a nih theihna tur hian Chawnpui Veng mipuite an tangrualin tha an thawh nasa hle a ni.

Chawnpui Sports Center hawnna-ah hian Aizawl Municipal Council-a Ward 10 bialtu Pu Lalzirliana te, Sports & Youth Services Director Pu Zoliana Royte leh Jt. Director Pu Vanluia te, IPRO Pu Lalremruata Kullai MIS te an tel a. YMA leh khawtlang hruaitu pawimawh tak takte bakah veng chhung mipui an kalkhawm tha hle bawk a ni.