Pu S.Laldingliana, Parliamentary Secretary,  chuan nimin (19.5. 2011) khan Integrated Watershed Management Project, Lunglei-III hnuaia a bialchhung Runtung khaw mipuite hman turin Syntex (tuizem lian) a sem.

IWMP Lunglei-III hnuaiah hian kum 2010 atang khan Project hi kalpui tan a ni a. Project Fund atan hian Central atangin cheng nuai za sarih sawmnga hmuh a ni a, heng sum lo lut te hi hmasawnna kawng hrang hrang, kawng sial, tui lak, lo neih, thlai chawm leh ramngaw humhalhna kawnga hman tur a ruahman a ni.Tun tuma syntex sem hi project sum lo lut za a pali atanga pek a ni.

Syntex semna hunah hi Pu John Tanpuia,MCS, BDO Lungsen in a kaihruai a. Pu Tanpuia hian IWMP awmzia leh kalphungte a sawifiah bawk. He huna Khuallian Pu S.Dinga chuan kalkhawmte hnenah thu sawiin "Chief Minister Pu Lalthanhawla kaihhruai Sawrkar chak takin hmasawnna leh changkanna tur hmathar tam tak a chhawp chhuah hi mipuite hian taimakna leh rinawmna nena kan lo dawnsawn a ngai a, kan flagship programme kalpui lai mek NLUP ngei pawh hi a dawngtu mipuite hian ti hlawhtling turin mawhphurhna sang tak kan nei a ni," a ti. Pu Dinga hian Runtung khaw mipuite chu an harsatna leh puih an ngaihna apianga theihtawp chhuahpui a inhuam thu a sawi a. Runtung panna kawng pawh he project sum hmanga motor lut thei a laih a nih tur leh kumin August thla chhunga kawng laih hna hi zawh fel a beiseiawm thu a tarlang bawk.