Vawiin khan North Eastern Development Finance Corporation Ltd. (NEDFi), Aizawl chuan Synod Office kawtah Incorporation Day vawi 16-na lawmna an buatsaih a. He lawmna inkhawmah hian an Project ‘Wall Painting by School Children’-a tel Synod Higher Secondary School, J.L. Higher Secondary School leh Govt. Mizo Higher Secondary School zirlai 16 te hnenah lawmman an hlan a ni.

NEDFi bultum leh huaihawta he ‘Wall painting by School Children’ Project-ah hian Mission Veng, Aizawl Tennis Court leh Dawrpui Veng bang-ah te heng zirlai naupangte hian mimal leh khawtlang tana zirtirna tha nei tur lemziak mawi tak tak an ziak a ni.

NEDFi hi August ni 9, 1995 khan din tan a ni a, hmarchhak biala mi chengte sum leh pai lama an harsatna te sutkian leh tanpui chu an hna ber a ni. Industry, Agriculture leh Finance lam kaihhnawih thilah NEDFi hian mi harsa zualte tan remchang a siam sak fo thin a ni.