North Eastern Development Finance Corporation Ltd. (NEDFi) chuan vawiin khan Business Meet NEDFi Lunglei Branch office, Chanmari I, Lunglei ah an buatsaih.

He Business Meet ah hian sumdawng mi (Entrepreneurs) 25 an tel a, Pi Olee Bora – Deputy General Manager (MSE & MF) NEDFI Head Office, Guwahati atanga lokal chuan kalkhawmte hmaah thusawiin, sumdawnna tenau deuhah chuan Mizoramah hian eizawnna atan a tha tak tak tih tur tam tak a la awm thu leh chung ang a hmalate chu NEDFi hian a tanpui theih thu a sawi a ni. NEDFi hian thiamna tipung tur a training leh loan hmang a sumdawng mite a tanpui mai bak piah lamah hian an thil siam chhuahsa hralhna kawngah te pawh thil siam chhuaktute an tanpui thin a ni. Pi Olee Bora- i hian sumdawng tenau deuh te hma ngaiin NEDFi chuan Project Cost Nuai 50 (Rs. 50 lakhs) chinah chuan an interest rate pawh kum khatah 8% (Za zel a pariat) a an tih hniam thu a sawi bawk a ni. Pu Bijan Saha – Manager, NEDFi Guwahati leh Pi Lalthianghlimi, NEDFi Aizawl Branch Manager te pawhin thusawina neiin NEDFi hmalakna hrang hrang leh an sheme neihte an sawifiah bawk. Hemi hnu hian inkawmhona nei leh in, NEDFi hotute hian kalkhawm te’n zawhna hrang hrang an zawhte chu an chhang bawk a ni.

He hunah hian NEDFi hotute chuan Aizawl a an Office-ah “Business Facilitation centre” an din thu sawiin, mipuite tlawh thin turin an sawm nghal bawk. He centre-ah hian sumdawngtute chu counselling pek thin ni in, mi tha te chu a thlawn a Project report an siamsak theih thu an sawi bawk a ni. NEDFi Lunglei Branch Manager Pu Lalhruaizela Fanai in lawmthu sawiin he Business Meet hi a khar a ni.