All India Radio Aizawl Station Director Room-ah vawiin khan All India Radio leh Doordarshan Officer ten All India Radio leh Doordarshan programme leh Chanchinthar puanna lam tihchangtlun dante an sawiho a. Guwahati atanga lo zin AIR leh Doordarshan Additional Director General Pu C.Lalrosanga hovin programme hlui leh hlute vawn thatna tura digitalization scheme hman mekte an sawi ho a. Tunhma atanga AIR leh Doordarshan in recording hlui leh hlu an neih zawng zawngte thliar fela vawnthat vek nise an ti a. AIR leh Doordarshan Regional News Unit-te Chanchinthar thehdarhna kawnga tha zawka an thawhho dan turte an sawi bawk.

Pu C.Lalrosanga chuan AIR Aizawl programme puan hun chhung chu darkar 3-a pawhsei tum a ni a ti a. AIR Aizawl FM Zoawi programme pawh zing atanga zan thlenga pawhsei tum a ni a ti bawk. Vawiina AIR leh Doordarshan hotute thutkhawmnaah hian Pu Dinesh Das, DDG, AIR, Guwahati bakah Pu Rajesh Beldar, Dy. Director Engineering, AIR, Aizawl, Pu Birla Nanth, Dy. Director Engineering, DDK, Aizawl, Pu Mangjangam Touthang, DD(News), DDK, Aizawl, Pu Nando Singh, N.E., AIR, Aizawl leh officer dangte an tel a ni.