Anthurium Festival 2012 chu vawiin khan Reiek Tourist Resort-ah tan a ni. He Kut nithum chhung awh tur hi Governor Pu Vakkom Purushothaman chuan a hawng a, Pu K. Lianzuala, Chairman KVI chu khual zahawm a ni. Hawnna inkhawm hi Pi B. Sairengpuii, Secretary, Tourism in a kaihruai a ni.

Governor chuan Mizoram hi hmun nuam leh thengthaw tak leh hnamzia mawi tak nei a ni a, khualzin mite kan hip thiam chuan God’s Own Country of the East ah kan siam thei a ni a ti. Miten Mizoram an hriat larna pakhat chu Anthurium a ni a, hemi hmanga khualzin mite hip nana kut an buatsaih chu Tourism Department fakawm a tih thu Governor chuan a sawi.

Pu K Lianzuala pawhin thusawiin kut hnathawktute thawhrimna a zarah hetiang hun hi kan thleng thei a ni a ti a. Tourism department ten kut hnathawktute tharchhuah pholanna hun an siam chu lawmawm a tih thu a sawi bawk.

He kut ah hian Mizo Cultural Organisation, Lai Cultural Troupe, Mizoram Gorkha Youth Association , Chakma Cultural Troupe ten hnam lam chi hrang hrang an entir a, zaipawl leh zaithiam hrang hrang te pawh an tel. Mipui a duh apiang tan a tel theihna Air Rifles in kah siak te, thing in lawn siak te bakah naupang kum 12 hnuai lam tan sangha in man siak te he kut ah hian a awm a ni. Mizo thil siam handloom leh handicraft pholan leh zawrh anih bakah traditional costume parade leh fashion show te buatsaih a ni.