NEDP-Entrepreneurship Development Scheme (EDS) hnuaia mahni kutke a ding thei tura hmalaa intihsiakna 'Micro Start-up Competition' a titha thlanchhuah zinga mi Zo Agri Business Solutions, Edenthar Venga mi chu vawiin khan Minister I&PR leh bialtu MLA ni bawk Pu Lal Thanzara'n a hawng.

Hawnna inkhawmah hian Pu Lal Thanzara chuan mahni kutkea ding thei tura hmala tute leh tang te chu sorkarin a ngaipawimawh a ni tiin, heng NEDP-EDS hnuaia bul tan tura ngaihtuahna senga hmala an awm chu lawmawm a tih thu a sawi. Mahni kutkawiha ngaihtuahna senga hmala a, engkima sorkar beisei loh kan zir a ngai a ni a ti a. Minister chuan Pathianin Mizote chu ram nuam, sik leh sa tha, ruahtui tlak thatna hmun leh thlai chitin rengin a ngeih ram min pe a,  he kan ram thatna hmang tangkaia mahni intodelh tura hmala turin taimakna leh remhriatna kan mamawh a ni a ti. Vawiin a hawn tak Zo Agri Business Solutions neitu pawh hmasawn zel tura hmala turin a fuih a ni.

Vawiin hun hi Pu Joseph L.Ralte, Expert member, MEDMOC in kaihruai a. Pu C.Vanlalramsanga, Secretary Planning & Implementation Dept. in NEDP hnuaia hmalak tawhna thenkhat tarlangin, NEDP-EDS hnuaia entrepreneur thlanchhuah te chu an hmalakna te enpui zui zel an ni dawn a ni a ti.

Zo-Agri Business Solutions (Mizoram Sacha Inchi) hi Pu Melvyn Vanlalhlimpuia ta a ni a. NEDP-EDS hnuaia MEDMOC in Micro Start-up competition an siam a titha thlanchhuah 15 zinga mi a ni a. Herbal thingpuife Sacha Inchi siamchhuahna khawl bunin hma an la mek a. Kuthnathawktu 70 chuang he thingpuife hi chin tirin, hralhchhuah theih tura hmalak mek a ni.

Attachment

• Loading attachment...