Rashtriya Madhyamik Shiksha Abhiyan (RMSA) Lawngtlai District leh SkyNet te tang kawp huaihawtin Lawngtlaia high sikul zirlaite tana quiz intihsiakna (Inter-High School Quiz Competition) chu Lawngtlai Council Venga SSA BRC Hall-ah buatsaih a ni a. Nizan khan a hmawr bawk a ni.
RMSA leh SkyNet cable TV te tang kawpina quiz competition an buatsaihah hian Lawngtlai khawpui chhunga high sikul paruk atangin zirlai pahnih telna team khat theuh an chhuak a. November ni 7, 2017 zan khan preliminary round inelna neih niin, heta a ti tha team 3 te chuan nizan khan final round an hmachhawn leh a ni.
Final round khelh zanah hian LADC-a School Education (M/S) changtu Executive Member Pu Laltlawmlova Chinzah chuan hun hmanpuiin, zirlaite fuihna thu a sawi a. Inter-high school quiz competition buatsaih a ni chu lawmawm a tih thu leh zirlaite’n an hlawkpui ngei a rin thu sawiin, zirlaite chu ram hma hun innghahna an nih anga tha taka lehkha zir tur leh hlawhtling tura tun atanga inpuahchah lawk turin a fuih a ni.
He hunah hian tun hnaia LADC-a Group B Gazetted Officer hna lak thara inziak tling pahnih, Pi Priscilla Lalramdinpuii, Circle Education Officer (M/S) leh Pu David A. Lalhmingchhuana, Superintendent, GAD te pawhin competitive exam khawvela an thil tawn leh an inbuatsaihna te hmangin zirlaite fuihna thu an sawi a. RMSA Coordinator Pu RC Lalramnunpuia’n lawm thu a sawi bakah, Downtown English School naupangte rimawi tum ngaihthlak a ni bawk.
Lawngtlai District inter-high school quiz competition final round-ah hian Don Bosco School, ML Junior English School (MLJ) leh Ngurnunsangi English School (NES) te an intum a. NES ai awh Rothuampuia leh Jeffrey Sangthantluanga te chu pakhatna niin, pawisa fai Rs 10,000/- + medal + citation an dawng a. Pahnihna Don Bosco School ai awh Stephen Duathmunsanga leh Jeffrey A. Lalhriatrenga te niin, pawisa fai Rs 7,000/- + medal + citation an dawng a. Pathumna MLJ School ai awh Vanlalremruatpuia leh Lalhmunmawia te niin, pawisa fai Rs 5,000/- + medal + citation an dawng a. Best Quizzer atan Rothuampuia, NES chu thlan niin, trophy hlan a ni bawk. Lawmmante hi EM Pu Laltlawmlova Chinzah leh Lawngtlai DIPRO Pu C. Lalhruaitluanga te’n an hlan a ni.
