Vawiin khan Lunglawn Mual ah Sub-Hqrs YMA Lunglei bultumin Inter Branch YMA Volleyball Tournament neih chu kharna hun hman a ni. Lunglei Bawrhsap Pi Lalzarmawii, IAS chuan khuallian niin a hmanpui.

He Inter Branch YMA Volleyball Tournament kharna inkhawm  Pu RK.Rochamliana, Chairman, Sport Committee  kaihhruaiah hian Pi Lalzarmawii chuan thu sawiin YMA Sub Hqrs. Lunglei leh Lunglei District Volley Ball Association ten tha taka he Inter Branch Volleyball Tournament  an buatsaih chu an fakawm a tih thu a sawi a.  YMA branch hrang hrang inpawh tawnna leh thawh hona tha lehzual a siam a beisei thu sawiin infiam mite pawhin kawng engkimah insumtheihna neia infiammi rilru diktak, dawhtheihna, chhelna leh zaidamna an neih fo a tul thu a sawi bawk a ni. Pi Lalzarmawii chuan Lunglei District-in sports lamah nasa takin hma a sawn tih sawiin infiamna chi hrang hrangah tan la leh zual tur leh nu leh pate pawhin tuipui a, in senso deuh a ngaih hunah pawh in senso ngam a tul tiin chu chuan hlawhtlinna tak tak a siam thei a ni a ti a. Infiamna hi mizo thalai tam takin eizawn nan an hmang mek tawh a, a tam thei ang berin eizawnnan hmang thei tur a tan la turin infiammite a fuih a ni.

Inter Branch YMA Volleyball Tournament hi 6th November atanga 16th November 2017 chhungin Mipa Team 18 leh Hmeichhia Team 9 ten an khel a ni.