Vawiin khan Lawngtlai District Legal Services Authority (DLSA) leh Central YLA Kumpuan Committee tang kawp huaihawtin Lawngtlai-III-a CYLA Hall-ah Lawngtlai khawpui chhunga YLA branch-te tan dan zir hona leh CYLA Kumpuan hma lakna thlir hona hun buatsaih a ni.

He hun hi CYLA Kumpuan Committee Vice Chairman Pu F. Chanliana’n a kaihruai a. CYLA President Pu J. Sangthangpuia chuan thu sawiin, YLA Kumpuan “Ram leh hnam humhalh” kawnga hma laknaah dan bawhchhiatna a la thleng lo chu lawmawm a tih thu sawiin, YLA branch hrang hrangte pawh dan kalha chet loh hram tum zel turin a chah a. Kumpuan hma laknaah a bul tan that a pawimawh rualin, a tawp khar that pawh a pawimawh hle a ni, a ti.

He hunah hian CYLA Secretary Pu JH Lalrindika pawhin thu sawiin, ram leh hnam humhalh tura thil pawimawh hrang hrang a sawi a. CYLA Kumpuan Committee Secretary Pu Joseph Lalhmingthanga’n Kumpuan hma lakna hrang hrang report a pe a. Lawngltai khawpui chhunga YLA branch hrang hrang Kumpuan Committee-te hma lakna report ngaihthlak a nih bakah, zaithiamte zai ngaihthlak a ni bawk.

He hunah hian DLSA lam atangin Legal Aid Counsel Pu ST Ramhmachhuanmawia chuan “Tlawmngai pawlte leh India ram dan” tih thupui hmangin thu a sawi a. Lawngtlai District Child Protection Unit (DCPU) lam atangin Legal-cum-Probation Officer Pu Tommy Hmingdailova chuan “Human Trafficking” chungchang leh “JJ Act leh POCSO Act” chungchang a sawi bawk a. Zawhna leh chhanna hun pawh hman nghal niin, YLA te’n ram leh hnam humhalhna kawng leh khawtlang tana kawng hrang hranga hma an laknaah ram dan zah thiam taka ke pen a tul thu uar taka sawi lan a ni.

Vawiina dan zir honaah hian Lawngtlai khawpui chhunga YLA branch 12 atangin ai awh member 4 theuh an kal khawm a. Lawngtlai DLSA Secretary, Chief Judicial Magistrate ni bawk Pu BT Lala Sakachep leh Lawngtlai DIPRO Pu C. Lalhruaitluanga MIS te paw’n he hun hi an hmanpui a ni.

Attachment

  • Loading attachment...