Vawiin chawhma khan NLUP Conference Hall-ah Chief Minister Pu Lal Thanhawla leh sawrkar mi pawimawh ten NLUP hlawhtlinna hrang hrang phochhuahna tur, NLUP Fare cum Exhibition, 'NLUP Kutpui'  hman dan tur an rel a.

Meeting kaihruaitu, Chief Minister Pu Lal Thanhawla chuan NLUP chu mirethei lamtang programme a ni a, mi tam tak tan malsawmna a ni chho mek a, hlawhtlinpuitu tam tak an awm tawh a ni a ti. NLUP hlawhtlinnate pholan leh NLUP tanpuina dawngtute thil tharchhuah leh hlawhtlinna rah te hralhna hun remchangah Kut buatsaih a ni tur chu thil lawmawm tak a nih thu a sawi a. NLUP ah tunlai khawvel mamawh chhanna a awm vek a - tuihna kangchat mek siamthatna te, khawvel lum chho zel atana mamawh ramngaw tha siamna, nungcha humhalh, ei leh bar intodelhna leh mihringte nun khawchhuahna atan a thil tul tam tak NLUP-ah hian a awm kim vek a. Chuvang chuan Central sawrkar pawhin tha a ti  a,  Mizoram in NLUP atan sum a dil pawh khan  a let a tam a lo phalsak zawk tih a sawi a. "UNO te paw'n NLUP chu  mirethei lamtang programme a ni tih an hriatchian avangin rawn tel ve an duh a, kan thawkdun ta a ni", a ti.

NLUP Kut hman dan tur relnaah hian NLUP Nodal Minister Pu KS Thanga, NIB Chairman Pu JH Rothuama, MIFCO Chairman Pu PC Zoramsangliana, Deputy Chief Whip Pu RL Pianmawia, MAMCO Chairman Dr. Ngurdingliana, Lt.Col ZS Zuala,Retd, MLA leh Pu T.Sangkunga, MLA te bakah sawrkar hotulian te an tel tha hle a. NIB Vice Chairman Pu PL Thanga sawi dan chuan  NLUP Kut chu State Level Function angin ni 4 chhung hman a ni dawn a. Hall 7-ah NLUP hmalakna leh hlawhtlinna pholanna atan thlalak tarchhuah a ni dawn a, NLUP dawr 103 siam tura ruahman niin chungah te chuan NLUP hmalakna atanga tanpuina dawngtute kutchhuak leh thil  tharchhuah  zawrh a ni dawn a. Function neihna tur, lirthei hunna tur, Restaurant leh intihhlimna hmun te buatsaih a ni bawk ang. Kut neih hun tur hi, Kut huaihawttute inpeih fel hunah a hriat theih dawn a. NLUP Kut Organising Committee chuan Aizawl khawpui chhungah Sipai lammual chu hmun remchang tlemte zinga mi a nih angin helai hmun a Kut nghah a nih theih nan, Lammual enkawltute - Assam Riffles leh Mizoram Football Association dawr a tum a ni.