New Economic Development Policy (NEDP) hnuai a Entrepreneurship Development Scheme (EDS) programme kalpui mek ah “Innovation Club” member, zirlai 10 te chuan “Festival of Innovation 2017”, Rashtrapati Bhavan, New Delhi a neih chu 8-9 March, 2017 khan an zuk chhim.
New Economic Development Policy (NEDP) hnuaia Entrepreneurship Development Scheme (EDS) hi Planning Department hmalakna niin, hemi scheme atan hian Mizoram State Entrepreneurship Development and Monitoring Committee (MEDMOC) din a ni a. EDS kalpui tur hian MEDMOC chuan programme hrang hrang duangin, chung zingah chuan “Exposure trip/study tour for young potential entrepreneurs” telh ve a ni a. A thawh khatna atan zirlai te zinga “Innovation Club” member 10 te thlan an ni a. Heng member thlan te hian “Festival of Innovation 2017”, Rashtrapati Bhavan, New Delhi a neih mek chu 8-9 March, 2017 khan an zuk chhim a ni.
Festival of Innovation hi President Office hmalakna niin, a tum ber chu mahni ngaihtuahna hmanga thil tha tangkai tak tak siamchhuak thinte (grassroot level innovator) hriatchian a, an thiamna hlutsak leh tihhmasawn zel a ni.
March ni 8 hian nilengin ram puma hmun hrang hrang a mi Innovation Club ten poster exhibition an nei a. Design Innovative Center ten an khawl siamchhuah leh design te an pho lang a. Grassroot innovator te zinga lawmman dawngten an thilsiam te an pho chhuak bawk a ni. Grassroot innovator te hian an idea tha tak tak hi tihhlawhtlina hman tangkai a nih theih nan National Innovation Foundation-India hian nasa takin hma a lakpui mek a ni.
March ni 9 hian Medical Science leh biotechnology lam exhibition neih a ni a. Hemi exhibition ah hian science thiamna hmanga hautaklo thei ang bera natna khirhkhan tak tak enkawl theih dan te, rualbanlo tana smart wheelchair te, naute pianghlim thihna tam lutuk tihhniam nana hmalakna hrang hrang te phochhuah a ni. He Programme a kal ten hlawkthlak an tiin anmahni ah chona nasa tak a awm thu an sawi.
NEDP (MEDMOC) hnuai a EDS hmalakna dang pakhat ah Trainers’ Training (Master Trainer Development Programme) College/University atanga zirtirtu 10 thlanchhuah te tan NI-MSME, Hyderabad ah 20th -24th March 2017 Intensiver Training neih leh bawk tur a ni.
