Thingdawl Farm, Kolasib a Agriculture Department in New Economic Development Policy (NEDP) hnuaia purunsen an chin chu vawiin khan Col.Z.S.Zuala, Parliamentary Secretary hovin seng a ni.

Purunsen sengna a inkhawm tawi neih Pu R.Lalnunzira, DAO kaihhruaiah hian Parliamentary Secretary Col.Z.S.Zuala chuan purunsen chin chu mitin leh nitin mamawh a nih avangin chin uar atana a that thu a sawi a. Purunsen chin hlawhtling taka enchhin a nih chu lawmawm a tih thu sawiin, Agriculture Department te kuthnathawktute zirtir kawngah field a chhuak hnem leh tan la zual turin a fuih a ni.

Thingdawl Farm a purunsen chin hi enchhinna niin, a chi hi Bhima shakti leh Bhima kiran, Directorate of Onion and Garlic Research, Pune, Maharashtra atanga lak a ni a. Thingdawl Farmah hian 1acre ah chin niin, 70-100quintal vel tharchhuah beisei a ni a. He Farm a Purunsen chin enchhinna hi a hlawhtling thawkhat a ngaih a ni a, chin dan turin inzirtirin hmalak tum a ni.

NEDP hnuaiah hian Kolasibah Rice Mill din nan 80lacs ruahman anih thu Agriculture Department hotuten sawiin, hei hian Mizorama buhtharte ramdanga sawngbawl tura thawn ngailoa buatsaih theih nana duan a ni an ti a. Purunsen chin nan hian NEDP hnuaiah vek hian 160lacs ruahman a nih thu vawiin hian tarlan a ni bawk.

Vawiin purunsen sengnaah hian District Bawrhsap Dr.Arun T, Pu C.Lalzahngoa, SP, Media Officer,I&PR leh official dangte an tel a ni.