Mizoram Governor Lt Gen Nirbhay Sharma, PVSM, UYSM, AVSM, VSM, (Retd) leh Mizorama cham mek Indian Ambassador to Myanmar Pu Vikram Misri, IFS te chu nimin tlai khan Raj Bhawan-ah an inkawm. 

Mizoram Governor chuan Pu Vikram Misri te nupa in Mizoram an rawn tlawh avangin lawmthu a hrilh a, India sorkarin ‘Look/Act East Policy’ chak taka a kalpui takah chuan hmarchhak bial a state hrang hrangte hmelhriat leh zirchian hi tih makmawh a ni tiin a hrilh a; chumi rual chuan hmarchhak state-a chengte pawhin sorkar laipuiin he Policy kaltlanga helai bial tana ruahmanna a neihte chu an hriat leh thlawp ve a pawimawh a ni, a ti. 

Ambassador Pu Vikram Misri chuan an nupain hmarchhak bial an fan mek thu sawiin Mizoram chu India leh Myanmar inlaichinnaah dinhmun pawimawh tak a luah avangin he state a tlawh thei chu a lawm thu a sawi a. Champhai leh Zokhawthar pawh tlawh a tum thu leh hmarchhak state dang Meghalaya leh Tripura te pawh an tlawh dawn tih Governor a hrilh. Sorkar laipui pawhin hmarchhak state ten harsatna an tawhte a hmunah ngei hmelhriat a, sutkian dan tur leh tihhmasawn a tum hle a ni, a ti bawk. 

Nimin tlaia an inkawm hnuah Governor Pu Nirbhay Sharma te nupa chuan Ambassador Misri te nupa chu zanriah an kilpui nghal a ni.