I&PR Department huaihawta NEDP hnuaia Press Project Site Visit-ah Lawngtlai District MJA-te chuan nimin piah khan India leh Myanmar insumdawn tawnna tur KMMTTP kawngpui laih mek chu hna thawh tawh dan leh thawh mek dan te zir chiangin an tlawh.

He press project site visit-ah hian Lawngtlai DIPRO Pu C. Lalhruaitluanga MIS hovin Lawngtlai District MJA member 4 an kal a. Kaladan Multi Modal Transit Transport Project (KMMTTP) kawngpui laih mek enkawltu PWD Multi Modal Project Division-a SDO pahnih Er Joseph Laldintluanga leh Er Perry Minho leh thawktu dangte leh kawng laih hna thawktu contractor-te'n tawiawmin, an hriat duh angte an lo hrilhfiah a ni.

Kaladan Multi Modal Transit Transport Project (KMMTTP) hnuaia Mizoram chhunga kawngpui kal tur hi km 99.83-a thui niin, Package 3-ah then a ni a. Package-I hi km 0-38 niin, RDS Company-in an contract a. Package-II hi km 38-71 niin, Atlanta-ARSS Company te’n an thawk thung a. Package-III km 71-99.83 hi RDS bawkin an thawk a ni.

Package-I (0-38 km)-ah hian Revised Estimate-2 (RE2) angin Rs 377.99 crore sanction a ni a. Formation cutting (a laih) hi km 37.04-ah km 36 zawh tawh a ni. Culvert siam tur 183 awm zinga 98 chu siam zawh tawh a ni a. Side drain km 40.13 laih turah km 5.25 laih zawh tawh a ni. Lei dawh tur pakhat awmin, hna la tan loh a ni a. Kawng hi km 34.59 luan (blacktop) turah km 12 luan tawh a ni a. Package-I hi 30.06.2018-a zawh tura tinzawn niin, a pumpuiin 59.57% thawh zawh tawh ang a ni.

Package-II (38-71 km)-ah hian RE2 angin Rs 305.61 crore sanction a ni a. Formation cutting hi km 25.78-ah km 25.58 zawh tawh niin, la laih loh hi metre 200 a ni. Culvert siam tur 110 awm zinga 92 chu siam zawh tawh a ni a. Side drain km 33.82 laih turah km 17.9 laih zawh tawh a ni. Lei dawh tur pakhat awmin, hna tan chhoh mek a ni a. Kawng hi km 25.78 luan (blacktop) turah km 17.9 luan tawh a ni a. Package-II hi 30.06.2018-a zawh tura tinzawn niin, a pumpuiin 80.18% thawh zawh tawh ang a ni.

Package-III (71-99.83 km)-ah hian RE2 angin Rs 327.92 crore sanction a ni a. Formation cutting hi km 26.81-ah km 26.33 zawh tawh niin, la laih loh hi metre 480 a ni. Culvert siam tur 135 awm zinga 113 chu siam zawh tawh a ni a. Side drain km 28.34 laih turah km 13.36 laih zawh tawh a ni. Lei dawh tur paruk (6) awmin, pakhatah bul tan tawh a ni a. Kawng hi km 26.81 luan (blacktop) turah km 9.97 luan tawh a ni a. Package-III hi 31.12.2018-a zawh hman tura tinzawn niin, a pumpuiin 65.9% thawh zawh tawh ang a ni.

A zavaia belh khawmin RE2 angin Rs 1011.52 crore sanction a ni a. Formation cutting hi km 87.91 zawh tawh niin, la laih bak km 1.72 a awm a. Culvert siam tur 428 awm zinga 303 chu siam zawh tawh a ni a. Side drain km 102.29 laih turah km 36.51 laih zawh tawh a ni. Lei dawh tur pariat (8) awmin, pahnihah bul tan tawh a ni a. Kawng hi km 87.18 luan (blacktop) turah km 39.87 luan tawh a ni a. A pumpui khaikhawmin 68.55% thawh zawh tawh ang a ni.

A kawng enkawltu leh contractor-te’n harsatna hrang hrang an sawi zingah kumin fur rei lutuk leh ruahtui tam lutukin an hna thawh nasa takin a tikhaihlak a. Ko bang sang leh lei nghet lo avangin lei minin kawng a hnawh a awm deuh reng a, sum sanction-a tel lo leh hna danga pensan theih loh lei min then ngai reng chu an harsatna lian tak pakhat a ni. Hei bakah hian kawng luan zawh tawh leh tuiluankawr siam zawh vek tawh chu, kawng chhak lama thing zai tur la thinte thing tawlh avangin hmun eng emaw zatah a chhia a. He’ng thing lakte hian kawng a dal mai bakah kawng siam sa a tihchhiat thin avangin a hnawksak hle.

Hmun thenkhat chu a nih tur anga luan zawh a nih hmain, fur ruahtuiin a lo tihchhiat te a awm a, hei hi a enkawltute chuan an thawm tha leh mek bawk a. Ramri hnaih lam hmun thenkhat chu ram buai (land acquisition problem) la chin fel theih loh vanga hna thawh theih rih loh lai a awm bawk. Contractor-te chuan an duh khawp hmanraw lak khawm kawnga harsatna an tawh thin thu sawiin, hmanraw tam tak cement leh bitumen ang chite pawh rei tak dah that theih a nih loh avangin fur laia lo lei khawl chi a ni lo va, hmun tin atangin ruahtui hul hnuah inchuh a ni thin a, hei hian hmanrua a tivangin hna a tisawt lo hle thin tih an sawi.