Champhai District chhunga Agri. Field Officer leh technical staff te pualin vawiin khan DAO meeting hall, Champhai ah Purun chindan training neih a ni a. Training pe tur hian Aizawl atangin Pu Lalthanzuala, Dy. Director(Agro.) leh Lalhmingmuana SMS te an lo kal a ni.

Champhai District DAO Pu R.K. Nithanga chuan Champhai District Agriculture Office inbuatsaihna report pein ram Acre 90 a zau, cluster 13 thlanchhuah fel tawh a nih thu leh heng cluster 13 zing a cluster 1 chu KVK lam enkawl tur ni in, a bak zau 12 te tan a viltu tur Officer ruat fel vek an ni tawh tih a tarlang. Officer te hian Training neih zawh atangin anmahni enkawl cluster theuh ah lo neitute training pe in community nursery an buatsaih nghal dawn a, leilet buh seng zawh veleh a phun nghal theih tura inbuatsaihna kalpui mek a ni.

Mizoram sawrkarin NLUP chhunzawmna atana policy a ruahman NEDP hnuaiah Agriculture Department chu Purun (Onion) ching tura tih a nih angin ruahmana kalpui mek a ni a. Directorate of Onion and Garlic Research (DOGR), Pune atangin purun chi tha, Bima kiran leh Bima shakti, quintal 6 chah thlen tawh ni in Aizawl, Lunglei, Champhai, Serchhip, Mamit leh Kolasib District chhung ram Acre 240 a chin tura ruahman a ni.

Purun chindan training hi Aizawl, Lunglei, Mamit leh Kolasib District ah te neih zawh tawh niin Serchhip District ah neih leh tur a ni ang.