Vawiin khan Mizoram Food Processing Research & Training Centre (MFPRTC), Phaibawkkawn, Seling-ah New Economic Development (NEDP) hnuaia Entrepreneurship Development Scheme atanga “Entrepreneurship & Skill Development Programme (ESDP) on Post-Harvest Management” batch hmasa ber neih tan a ni. He training hi Seling, Sesawng, Tlungvel leh Tlangnuam khua atanga farmer te tana buatsaih a ni a. Training-ah hian thlai leh thei thar chhuah hlawk zawka enkawl dan  kuthnathawktuten an zir dawn a ni. 

Training hawnna thu sawiin Pu Joseph L. Ralte, MFPRTC Centre Director chuan, Mizorama development chi hrang hrang lokal awmze neia chhawr tangkai tur chuan entrepreneurship lam chawikan a tul tiin Mizoram hmasawnna hi a bulthut (grassroot)-a a intan a ngai a, a grassroot-a awmte chu kuthnathawktute an ni a ti a. Kut hnathawktute theihna haichhuak turin tunlai khawvel mil a training mumal pek an ngai a, chutiang atan chuan he MFPRTC centre hi din a ni a ti. 

Pu Joseph L. Ralte chuan kuthnathawktute tharchhuah enkawl zui leh hlawk tura sumpaia chantir dan zirtir hun post-harvest management training hi buatsaih a nih thu sawiin hetiang training hi tlangdung khaw hrang hrang tan NEDP-EDS hnuaiah kalpui zel tum a ni a ti bawk.  

Mizoram Food Processing Research & Training Centre (MFPRTC), Phaibawkkawn, Seling hi Commerce & Industries Dept, Govt of Mizoram hnuaia din niin Thei leh thlai sawngbawlna atana zirbingna - research leh training chi hrang hrang kalpuina tur a ni a. College leh University zirlai te, food processing lam tuimi entrepreneur te, kuthnathawka huan neitute tan kumtluanin training programme chi hrang hrang kalpui reng tur a ni. He centre-ah hian Entrepreneurship leh Skill Development programme chi hrang hrang kalpui tum a ni bawk. 

NEDP hnuaia Entrepreneurship Development Scheme hnuaiah hian skills training cum entrepreneuship development programme hrang hrang kalpui chho mek ani.