Vawiin chawhma khan India ram hmung hrang hrang leh Mizoram district khawpui dang ang bawkin 11th Statistics Day chu " Aministrative Statistics" tih thupuia neiin  Directorate of Economics & Statistics(DE&S) Conference Hall, New Secretariat Complex-ah hman a ni. 

Statistics Day hi Nation Sample Survey(NSS) leh Central Statistical Organisation(CSO) dintu leh D²  Statististicsan tih tak, 'Mahalanobis Distance' rawn chhawpchhuaktu Prof. Prasanta Chandra Mahalanobis piancham hriatrengna atana hman thin a ni a. Vawin a he hun hmanna, neiin  Directorate of Economics & Statistics Conference Hall ah hian Dr.C.Vanlalramsanga, Secretary, Planning & Programme Implementation Department chuan lehkhabu pawimawh tak tak pathum - Statistical Handbook Mizoram 2016, Meteorological Data of Mizoram 2016 leh NEDP hmalakna hnuaia Strengthening of Statistical Data kalpuina atanga siam District 8 chhunga zirchianna, BPL Baseline Survey 2016 te chu a tlangzarh nghal a ni. 

Statistics Day puala fuihna thu sawitu Dr.C.Vanlalramsanga, Secretary, Planning & Programme Implementation Department chuan sawrkar in awmze taka hmachhawp tur a ruahman nan statistical data, information dik leh rintlak mithiam ten an finfiah thlap tawh hnu te chu thil pawimawh bik a ni a ti a.  Mithiam ten an zirchianna atanga an hmuh chhuah behchhan leh science thiamna hmanga finfiah data chauh lo chu hmasawnna ruhrel dinna kawnga ruahmanna hmanrua atan a hman tlaklo a ni a ti. Mizoram sawrkar in hmasawnna kawnga ke a pen theihnan Statistician ten dinhmun pawimawh tak an chelh thu a tarlang a. " Kan ram hruaitute te(policy makers) ten thutluk fing leh awmze nei an siam nan statistical data rintlak an neih a ngai a. Kan hruaitute mamawh information leh data dik pek hi keini statistician te mawhphurhna leh sawrkar in min rawih chhan", a ni ti in Statistics day hmangtu, mithiamte chu a fuih a ni. 

Directorate of Economics & Statistics Conference Hall a 11th Statistics Day programme hi Pu Lalchhuanawmna Hrahsel, Director, DE&S in a kaihruai a.  He hunah hian Dr.J.V. Nunchunga, Associate Professor, DE, J.Thankima college leh Pu Lalthlamuana Ralte, Asst. Professor, DE, PUC ten an inbuatsaihna lehkha hmangin "Administrative Statistics" zirchianna hun an buatsaih a. Administrative Statistics zirhonna hi zawhna leh inrawnkhawmna hun in a chhunzawm a ni.