I&PR Department huaihawta NEDP hnuaia chanchinbumite'n Mizorama hmasawnna project-te an zir chian theih nana ruahman press project site visit-ah Champhai District MJA-te chuan nimin piah khan India leh Myanmar insumdawn tawnna tur Lawngtlai District chhunga KMMTTP kawngpui sial mek an tlawh.

He press project site visit-ah hian Champhai DIPRO Dr Lallawmkima MIS hovin Champhai District MJA member 6 an kal a. Kaladan Multi Modal Transit Transport Project (KMMTTP) kawngpui laih mek enkawltu PWD Multi Modal Project Division-a SDO pathum - Er Lalruatfela Rokhum, Er Joseph Laldintluanga leh Er Perry Minho leh thawktu dangte leh kawng laih hna thawktu contractor-te'n tawiawmin, an hriat duh angte an lo hrilhfiah a ni.

Kawngpui sialtu Company RDS Project Ltd leh Atlanta-ARSS (Joint Venture) hotute chuan lei nghet lo leh lei min nasa lutuk chuan hna thawh a tihsawt loh thu lo hrilhin, ruahtui tam lutuk chuan hma lakna a tithuanawp deuh thin tih an sawi a. A hun taka zo hman tur erawh chuan theih tawp an chhuah thu an sawi.

Kaladan Multi Modal Transit Transport Project (KMMTTP) hnuaia Mizoram chhunga kawngpui kal tur hi km 99.83-a thui niin, Package 3-ah then a ni a. Package-I hi km 0-38 niin, RDS Company-in an contract a. Package-II hi km 38-71 niin, Atlanta-ARSS Company te’n an thawk thung a. Package-III km 71-99.83 hi RDS bawkin an thawk a ni. Package-I leh II hi June ni 30, 2018-a zawh tura tinzawn a ni a; Myanmar ramri lam dep Package-III erawh chu December 31, 2018 a zawh fel tura tih a ni thung. Kawng hi km 39.87 blacktop tawh niin, kawngpui blacktop chin hi metre 7 aia zim tur a ni lo va, leilawng atanga blacktop chung ber thlengin kawngpui chhah zawng hi feet 2.16 a ni.

NEDP press project site visit-a KMMTTP tlawhtu Champhai MJA-te chuan press project site visit chu hlawkthlak an tih thu leh chhunzawm zel chi nia an ngaih thu an sawi.