Energy renchem anih theihna tura ruahman, sumdawnna in (building) connected load 40kW chin chunglam sak dan phung duanna 'Energy Conservation Building Code' chungchangah vawiin khan Aijal Club-ah seminar neih a ni a. Seminar hi Electric Inspectorate P&E Department buatsaih niin Social Welfare Minister Pu P.C Lalthanliana chuan khuallian niin a hmanpui a ni.

Social Welfare Minister Pu P.C Lalthanliana chuan energy renchem tulzia hriaa hetianga hmalakna leh zirhona hun siam ani chu lawmawm a tih thu a sawi a. Minister chuan energy hnianghnar taka kan neih na tura sawrkar hmalakna te tarlangin December thlaa 60 MW pechhuak thei Tuirial Hyro ElectricProject hawn ani chu lawmawm a tih thu a sawi bawk a. Minister chuan kan ramah solar energy tam zawk dek chhuaha kan hman tam a tul thu sawiin Renewable energy siamna kawngah sawrkarin theihtawpin hma a la, a ti a. Pu P.C Lalthanliana chuan Solar energy MW 62 pechhuak turin Solar Power Policy of 2017 hnuaiah Vankal-ah MW 20 pechhuak thei tur, Lungpher ah 30 MW leh Sihhmui ah 10 MW pechhuak thei tur leh Tlungvelah 2 MW pechhuak thei tur solar energy siamna bun tura hmalak mek anih thu a sawi bawk a ni.

ECBC seminar hi Pu H. Lalengmawia IAS , Secretary, P&E Department chuan a kaihruai a, All India Institute of Local Self Government (AIILSG) atanga master trainer lokal Pu Kanagraj Ganesan chuan ECBC chungchangah presentation a bawk a ni.

Seminar ah hian Mizoram sawrkar Department hrang hranga Engineer leh Architect te bakah AMC leh MZU aiawh leh Private Consultant Firm te an tel bawk a ni.

Sawrkar laipuiin National Energy Conservation Building Code (ECBC) siamin State zawng zawng ten mahni State climate mil a State ECBC nei vek turin a ti a, tun dinhmunah State 10 leh UT pakhat in an mahni pualin ECBC hi an nei tawh a. Mizoram pawhin ECBC hi neih ngei tumin All India Institute of Local Self Government, New Delhi te nen tangkawpin hmalak mek niin Mizoram ECBC duanchhinna (draft) siam fel tawh a ni.