New Economic Development Policy bultuma buatsaih Press Study tour hmanga Champhai District chhunga sawrkar hmalakna leh pipu sulhnu fang mek Serchhip District MJA leh Lunglei District MJA member-te chuan Champhai District Bawrhsap charge la mektu Pi Lalsangpuii Hmar hovin DC Conference Hall, Keifangtlangah inkawmhona an nei.

Pi Lalsangpuii Hmar chuan Serchhip District leh Lunglei District MJA ten Champhai District chhunga sawrkar hmalakna leh pipu sulhnute en tura an lokal chu lawmawm a tih thu a sawi a. An zirchianna atanga thil tha zawk an hmuh leh hriatte chu District hmasawn zel nana sawi chhuak turin MJA member-te chu a sawm a ni.

Inkawmna hunah hian Pu K. Saitluanga, DIPRO Serchhip chuan NEDP hnuaia Press study tour, India ram leh Mizoram hmun hrang hranga neih a nih dan tlangpui a sawi a. MJA member ten an tour report leh Champhai District an hmuh dan hrang hrangte an tarlanga. Faina lama Champhai District-a hmasawnna nasa tak chu District dangte tana entawn tlak anih thu an sawi a. Hmalakna thenkhat duhkhawplo deuh leh tan lak ngaihna angte chu District thuneitu ten a tul anga lo enzui an tum bawk a ni. He inkawmna hun tawi buatsaih hi a bengvar thlakin a hlawkthlak hle a ni.

Serchhip District Press Study Team-te hi Pu K.Saitluanga DIPRO Serchhipin rawn hovin, Pi C.Lalremruati, DIPRO Lunglei hovin Lunglei Districti Press Study Team-te hi an rawn thawk chhuak a ni. Champhai Bawrhsap chuan Press Study Tour team-te tan hian zanriah tuihnai tak a buatsaih sak a, a chungah tour member-te an lawm hle a ni. Naktuk lamah Serchhip Team-te hian Chawngtlai leh Biate tlawhin Serchhip an pan leh anga, Lunglei Team-te erawhin Champhai leh a chhehvela sawrkar hmalakna leh pipu sulhnu an la tlawh kual dawn a ni.

He hunah hian Pu Pachhunga SDO (S); Pu K.Lalhmuakliana,DUDO Champhai; Pu Remlalliana Hnamte SDC leh Pi Laldinfeli SDC ten DC hi an tawiawm a ni.