Vawiin chawhnu khan New Economic Development Policy (NEDP) sensitisation programme Govt. T. Romana College (New Campus), Republic Vengthlangah buatsaih a ni a. He hunah hian Minister of Finance, Planning, etc. Pu Lalsawta leh Planning Secretary Dr. C. Vanlalramsanga ten zirlaite hnenah NEDP thiltum leh hmalaknate inhrilfiahna leh he policy in remchanna a duan chhuah hrang hrangte hman tangkai theih dan sawifiahna leh inkawmhona hun an nei a ni.
Minister Pu Lalsawta chuan NEDP kaltlangin thalaite leh ngaihtuahna themthiamte theihna (potential) haichhuakin, hmasawnna huamzau leh kumhlun siam tum a nih thu a sawi a. Mizoram chu ram chhengchhia leh ei leh bar a hmasawn ve tur pawhin ram dang anga ‘resource’ tha nei ve lo a sawi tur a nih mai loh zia sawiin, Finance Minister chuan Mizoram chu ram zalen, sik leh sa nuam leh tha tak a nih avang ten leh, ziak leh chhiar thiam a kan san zia te, state chhungah tawng khat hmanga tupawh kan inbiakpawh theihna te, ram inawpna lamah harsatna kan neihloh thu te leh a chhunga cheng mipui ten thu an awih na leh a hnam ang pawha thil zir chak mi kan nihna zawng zawng hi ram hmasawnna atan thil pawimawh tak vek an nih thu a sawi a. Kan ‘resource’ neih that ber chu ‘human resource’ a nih thu leh, chumi atan chuan NEDP hi a hmang tangkai duh ten an hman tangkai theih tura chhawpchhuah a nih thu a sawi a. Chutih rual chuan tumruhna leh thahnemngaihna tello chuan hmasawnna a kal chak theilo a ni, a ti a.
Minister chuan tunlaiah thalai lehkha thiam leh zir sang tak tak te awmin, sorkarah hna in heng mithiam zawng zawngte hi a daih loh avangin sorkar hna ringawta innghah a fuhloh thu a sawi a. Midang hna pek ringawt nghak lova thalai thluak tha tak tak ten anmahni thiamna hmangin an ngaihtuah chhuah ngei eizawnna siama tura ‘entrepreneurship’ lamah te an ngaihtuahna her tura a duh thu leh, chutah chuan sorkarin NEDP kaltlang hian an mamawhna ah a puih tur thu a sawi a. Taimak thalaiten kan mamawhzia Minister chuan tarlangin, tunlaiah pawl hming a kuthnathawh hreh nei miah silo, nitin eizawnna tur atan chuan thawh duh chin leh thawh hreh chin thliar leh lawi si kan awm thin hi intodelhna kawnga kan ram economy daltu pakhat a ni, a ti a. Mizo thalai te chu mahni ke a ding tura sawmin, politics lama hamthatna tur lam nilovin, ram hmasawnna atan mahni tih ve theih theuh tur ngaihtuah turin a sawm a ni.
Dr. C. Vanlalramsanga, Planning Secretary chuan NEDP chungchang hrilfiahna hun hmangin, Mizoramin hmasawnna bung thar a kai theih nan tanlak theihna apiangah sorkar chuan tan lak zel a tum a ni a ti a. NEDP hnuaia scheme leh programme hrang hrangte sawifiahin, NEDP hnuaia hmalakna hrang hrang kalpui mek te a tarlang a. Chung zingah chuan off-season cabbage chin te, thingtlang hmun hrang hranga agriculture link road siam te, Aizawl hmun hrang hranga junction (kawng pengthuam) siam that te, ruihtheihthil laka thalaite an fihlim theihna tura ruahmanna thar “Project Himna – MADAT (Mizoram Against Drugs, Alcohol and Tobacco)-te leh Entrepreneurship Development Scheme (EDS) te a tel a. NEDP strategy-te hmang hian NEDP chu bung hrang hrang sawm ah then a ni a. Kum 2016-17 atan khan Rs.250 crores dah niin, 2017-18 atan hian Rs.750 crores ah a pung chho a ni.
Vawiin NEDP Sensitization Programme-ah hian Govt. T. Romana College Principal Dr. Lalrintluanga chuan thu sawi bawkin, zirlaite nen zawhna leh chhanna hun neih a ni a. He programme-ah hian Planning Department atangin official an tel bawk a ni.
