Parliamentary Secretary, School Education Pu Joseph Lalhimpuia chuan vawiina Thingsulthliah Higher Secondary School ‘Fresher Social & Felicitation’ a hmanpuinaah Mizorama industry lian ber chu Education a ni a, Mizorama officer lian ber berte pawh Education-in a hrinchhuah te an ni a ti.

A sawizelnaah Khuallian Pu Joseph Lalhimpuia chuan insumdawn tawnnaah Mizoramin thil lian tham thawnchhuah leh siamchhuah a nei lova, lo neihah pawh ram thla hnih awrh ei bak tharchhuah a har a, chuvangin Mizote tana industry lian chu Education hi a ni, a ti. Zirlai kalkhawmte fuihna thu sawiin Pu Joseph Lalhimpuia chuan an zirlaibu piahlam inchhiar zau tur leh thawhrimna tak tak nen an zirna bei turin a hrilh a. Mizoram-ah kum tin graduate thar 3000 chuang an awm a, sorkar hna hian a daih vek dawn loh avangin zirlaiten eizawnna tur kawng dang an ngaihtuah tel a ngai a ni a ti a. Nu leh pate pawhin fate hmalam hun tur thlirpui thiam a, an lehkha zirna bakah an eizawnna tur kawng thlannaah rilru leh sum sen an inhuam phawt  chuan ram leh khawtlang nuam zawk a siam theih dawn a ni a ti.

Thingsulthliah Higher Secondary School hi kum 2004-ah din a ni a, he school atangin Top 10- ah vawi hnih an lang tawh a. Kum 2017 HSSLC result chhuakah candidate 38 zingah 35 an hlawhtling a, tunah hian zirlai 126 an awm mek bawk a ni. NLCPR hnuaia tanpuina an dawn hmangin Girls Hostel an sak mek chu hawn thei thuai beisei a ni.

Thingsulthliah HSS Fresher Social and Felicitation-ah hian Thingsulthliah BDO Pu Lalchhanhima chu Khualzahawm niin Pu C.Chawngthantluanga, Dy.SPD(A) RMSA leh NSUI President Pu Lalhmachhuana te an tel bawk a ni.